Nersa gee goedkeuring vir 9,4%-verhoging vir Eskom

Argieffoto (Foto: SnapwireSnaps, Pixabay)

Die Nasionale Energiereguleerder van Suid-Afrika (Nersa) het Eskom goedkeuring gegee om ʼn 9,4%-verhoging in 2019/2020 te implementeer. ʼn Verhoging van 8,1% is vir 2020/2021 goedgekeur en 5,2% in 2021/2022.

Die kragvoorsiener het aanvanklik ʼn 15%-verhoging oor die volgende drie jaar versoek weens finansiële probleme, insluitend ʼn skuldlas van meer as R400 miljard.

Eskom se verhoging sal nog meer druk plaas op verbruikers wat pas getref is deur ʼn groot petrolprysverhoging en van 3 April waarskynlik ʼn ekstra 29c per liter sal moet betaal vir staatsheffings, soos aangekondig deur Tito Mboweni, die minister van finansies, se begrotingsrede verlede maand.

Die burgerregteorganisasie AfriForum het intussen Nersa se besluit veroordeel en gaan redes van Nersa versoek vir hierdie verhoging wat ver bo inflasie is.

AfriForum is van mening dat jaarlikse tariefverhogings soos hierdie onvolhoubaar is en dat Eskom se staatsgewaarborgde monopolie op elektrisiteitsvoorsiening uiters ongesond vir die land, sy mense en die ekonomie is.

Nersa het ook ’n bedrag van R3,869 miljard toegestaan vir die regulatoriese aansuiweringsrekening (RAR) (Regulatory Clearing Account) nadat Eskom vir R22 miljard gevra het.

AfriForum het hierdie tariefverhoging uit die staanspoor teengestaan deur skriftelike kommentaar aan Nersa te lewer. Die burgerregteorganisasie se bydrae tot die openbaredeelnameproses was ’n voorlegging wat aanvoer dat die koste van Eskom se beweerde korrupte aktiwiteite en wanadministrasie by die berekening van die verhoging in die komende jaar se elektrisiteitstarief uitgesluit moet word.

Dr. Eugene Brink, strategiese raadgewer vir gemeenskapsake by AfriForum, sê dat Eskom nie kon bewys dat hulle groter verhogings verdien nie. “Die regering gebruik Eskom se alleenheerskappy as hefboom om die publiek en die sakesektor gyselaar te hou, wat met beste praktyke elders ter wêreld strydig is. Eskom se dominante posisie – dit verskaf 95% van die land se elektrisiteit – laat die organisasie ook toe om voortdurend aansoek te doen om buitensporige verhogings in kragtariewe. Die swak bestuurstyl en die feit dat verantwoordelike amptenare nie aanspreeklik gehou word vir wanadministrasie en korrupsie nie, is grotendeels wat die probleem by Eskom veroorsaak.”

Brink het bygevoeg Eskom se wanbestuur rondom munisipale skuld was ’n groot besprekingspunt tydens die openbaredeelnameproses. “Indien Eskom nie die bestuur van munisipale kragrekeninge kan hanteer nie, moet Nersa strenger teen partye optree wat lisensievoorwaardes verbreek. Suid-Afrika het ’n meer gedesentraliseerde kragsektor nodig.”

Morné Mostert, AfriForum se hoof van plaaslikeregeringsake, het gesê Eskom moet verkieslik geprivatiseer word, maar selfs indien dit in staatsbesit bly, moet dit uiteindelik slegs een van vele kragvoorsieners wees. “Dit moet, nes talle ander firmas in verskeie ander sektore, aan markkragte blootgestel word sodat verbruikers uiteindelik meer en beter keuses kan hê. Dít sal Eskom dwing om vermorsing en korrupsie uit te skakel om sodoende beter mee te ding, of die risiko te loop om onder te gaan,” het hy verduidelik.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Kolle

Mooi man. Leeg gesuigte belastingbetaler is nie die woord nie. Parasitisme op sy heel beste!

James

So as mens mooi dink betaal ons nou vir adisionele 9.4% van die bevolking wat nie vir krag betaal nie??????

BlinkStephaans

Dit was tog alles tewagte… nersa het geen tande nie… en totaal onbevoeg om eskom in die bek te ruk. Indien dit ooit sou gebeur dat ander kragvoorsieners tot die mark toetree sal eskom dieselfde pad loop as die lugdiens… totaal onbevoeg om mee te ding… en n jaarlikse inspuiting van die belastingbetaler dat die warboel tog net nie moet vrek nie. Ons gaan aanhou betaal om onbevoegde staatsinstansies aan die lewe te hou.

Koos de Meyer.

Nee lees mooi, 9.4%plus die ander 4. 41 alles tesaam 13.81% 1 April en dis nie ‘n April grap nie.

Chris

So nog n 15 % verhoging vir die onbevoegde korruptenare om weg te dra . So begin sakeondernemings personeel afle om die parrasiet te voed want daar is net nie meer genoeg geld n wins , vir werkers en die parasiete nie