NG Kerk aanvaar nuwe besluit oor gays

Die NG Kerk se algemene sinode het ’n besluit aanvaar waarvolgens daar ruimte is vir verskillende standpunte oor verhoudings tussen mense van dieselfde geslag.

Die besluit is Dinsdagaand by die vergadering van die algemene sinode in Benoni aan die Oos-Rand geneem nadat die vorige besluit in dié verband nietig verklaar is. Daar is beslis dat die vorige besluit wat in 2015 geneem is, prosedureel foutief was.

Die algemene sinode se 2015-besluit was dat gay mense wél in die kerk mag trou. Dié besluit is egter daarna verskeie kere herroep en weer ingestel.

Tydens Dinsdagaand se algemene sinode is ’n beskrywingspunt van die Wes-Kaapse sinode bespreek en met enkele wysigings aanvaar.

Volgens die besluit is die eenheid van die kerk gefundeer in ’n eenheid met Christus en die belydenisgrondslag en verbrokkel hierdie eenheid nie wanneer daar verskil word oor die Bybel nie.

Die algemene sinode moedig kerkrade aan, om by die aanwysing van persone in die ampte, lidmate se doop, belydenis, roeping, spiritualiteit en getuienis van leer en lewe; toegang tot die sakramente; integriteit van verhoudings, asook geskiktheid vir die spesifieke rol in ag te neem ongeag ras, geslag, klas of seksuele oriëntasie en identiteit.

Die algemene sinode het erken dat daar kerkrade en predikante is wat nie hulle weg oopsien om burgerlike verbintenisse tussen mense van dieselfde geslag te bevestig nie, maar dat daar ook kerkrade en predikante is wat wel bereid is om dit te doen.

“Die algemene sinode wil graag die ruimte wat vir almal geskep word, om volgens hulle oortuiging op te tree, bevestig.”

Daar is dus besluit dat ’n span saamgestel sal word om elke streeksinode te besoek om die saak duidelik en deeglik deur te werk.

Die algemene sinode het dit aan die Algemene Taakspan vir Leer en Aktuele Sake (Atlas) oorgelaat om ’n formulier te ontwikkel vir die bevestiging van burgerlike verbintenisse tussen mense van dieselfde geslag.

Volgens die algemene sinode betreur hy die verloop van die debat en besluite oor selfdegeslagverhoudings die afgelope paar jaar aangesien dit lidmate “verwar en seergemaak” het. Gay lidmate en hul families wie se menswaardigheid wetend en onwetend misken is, is ook uitdruklik om verskoning gevra vir die pyn wat hulle in die kerk beleef het.

Atlas is verder deur die algemene sinode versoek om voort te gaan met sy studie oor die huwelik en menslike seksualiteit met die oog op terugvoer aan die volgende sinode.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

243 Kommentare

jongste oudste gewildste
Elred Ferreira

Dis werklik tragies hoe die NG Kerk in n totale grap ontaard het…..

Ja swaer

Dus, eintlik sê die NG Kerk dat sonde maar toelaatbaar is om die wette van die ANC regering te gehoorsaam

Deurmekaar

SO laat ek dit nou reg verstaan. Eers aanvaar hulle nie “die sonde” nie dan doen hulle, dan doen hulle nie en nou doen hulle weer. Ek het nie gevra om gay te wees nie, niks het in my kinderjare gebeur om my oriëntasie te manipuleer / beïnvloed nie, maar niemand sal dit verstaan nie en ek verwag ook niemand moet nie, net soos ek nie oordeel as jy met honger oë die man of die vrou in die gym, straat of selfs basaar met begeerte dop hou nie – oh ja wag, NG Kerk mense doen dit mos nie.… Lees meer »

Vreedsaam

Die algemene sinode is ‘n uitgediende liggaam wat die NG kerk baie meer skade as goed doen. In my opinie is die sinode een van die hoofredes hoekom so baie NG kerke hulle deure moet sluit. My opinie het ook niks te make met hierdie artikel nie. Gays behoort presies dieselfde regte as enige ander persoon te hê. Uit persoonlike ervaring het ek gesien hoe dieselfde mense wat gay persone geen regte gun nie, met ‘n glimlag al hul bydraes aanvaar.

Kobus

Ek het gedink die NG kerk lewe volgende die bybel. Maar nou sien ek hulle lewe volgende die ANC. Dis lagwekking.