NGV: Openbare verhore in Mpumalanga ‘’n klug’

Argieffoto (Foto: DarkoStojanovic, Pixabay)

Die burgerregteorganisasie AfriForum het sy misnoeë uitgespreek met die verloop van die openbare verhore oor die wetsontwerp op nasionale gesondheidsversekering (NGV) en gaan ook regsadvies inwin oor die prosedurele onbillikheid van die proses tot dusver. Die parlementêre portefeuljekomitee vir gesondheid het van 25 tot 28 Oktober 2019 hierdie verhore in Mpumalanga gehou waar daar verskeie prosedurele probleme was.

Die verhore is veronderstel om objektief te wees om die gemeenskap se werklike gevoel oor NGV te kry. AfriForum-verteenwoordigers wat die verhore in Mpumalanga bygewoon het, het egter verskeie ongerymdhede opgemerk. Dit sluit in:

  • Pamflette (slegs in Zoeloe gedruk) wat die ANC se perspektief oor NGV weergee, is op die stoele by die lokale uitgepak.
  • Die lokaal vir die verhoor in Secunda is op dieselfde dag na Ermelo geskuif sonder om hierdie verandering enigsins te kommunikeer (AfriForum het gelukkig van die verandering te wete gekom).
  • Maandagaand (28 Oktober) se vergadering het ’n uur en ’n half voor die geskeduleerde tyd daarvoor geëindig, nadat die komitee aangedui het dat hulle na Johannesburg moes terugkeer om vir die verhore in die Noord-Kaap voor die berei. Dit het daartoe gelei dat AfriForum nie ’n spreekbeurt gekry het nie.
  • Verrigtinge het slegs in Zoeloe plaasgevind en daar was geen tolke beskikbaar nie.
  • Groot dorpsgebiede is by die proses uitgesluit, omdat geen openbare verhore daar plaasgevind het nie. Dus is die grootste gedeelte van belastingbetalers in die provinsie van die proses uitgesluit, terwyl dit juis dié mense is van wie daar verwag gaan word om NGV te help befonds.
  • Dit is duidelik dat die plekke wat gekies is vir hierdie openbare verhore om plaas te vind meestal in wyke geleë is waar die regerende party meer steun geniet.
  • Dit wil voorkom asof daar geen of baie min bemarking gedoen is om die publiek van hierdie openbare verhore in te lig.

Volgens Natasha Venter, AfriForum se woordvoerder vir NGV, blyk dit dat die openbare proses om die publiek se insette te kry van die begin af gemanipuleer word om ’n uitkoms te kry wat die implementering van NGV bevorder.

“Hierdie proses is nie die plek vir die ANC om sy pro-NGV-agenda te dryf of propaganda aan die publiek te versprei nie. Die pamflette wat die komitee aan die publiek versprei het, kommunikeer slegs die regering se valse beloftes dat NGV die antwoord op al die land se gesondheidsprobleme is. Dit maak egter geen melding van die massiewe gebreke wat hierdie voorgestelde stelsel inhou of die feit dat dit onbekostigbaar is nie,” sê Venter.

AfriForum gaan die openbare verhore van 1 tot 4 November 2019 in die Noord-Kaap bywoon, en beoog ook om die verhore in ander provinsies (wat nog nie bekend gemaak is nie) by te woon. AfriForum hou ook hierdie week gemeenskapsvergaderings in die Noord-Kaap om die gemeenskap oor die gevare van NGV bewus te maak en om hulle aan te moedig om die verhore by te woon.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Chris van Heerden

Mens kon dit seker verwag. Hulle maak net wat hulle wil.

Johan

Natuurlik gaan dit ‘n klug wees. Net nog iets wat die kommuniste op ons gaan afdwing…

hehehe

Gelukkig kan ons saam handevat en lekker rugby kyk. Of hoe….?

Manie van Worcester

jammer maat, ek verneder my nie deur anc beleid in sport te volg nie so my hand sal nie daar wees nie

Carel Pienaar

Dankie aan Afriforum wat die NGV sterk teenstaan en die manier hoe die ANC regering aanhou om die gemeentskap te verhoed om toe te tree tot die gesprek.