Nico Henning, die vermoorde Chanelle Henning se vervreemde man, se borgtogverhoor is Dinsdag in die Pretoria-streekshof uitgestel.
Henning se prokureurs het die uitstel versoek sodat meer dokumente aan die hof voorgelê kan word. Staatsaanklaer Gerrie Nel het nie die versoek teengestaan nie.
Hooflanddros Desmond Nair het die saak tot Vrydag uitgestel. Henning sal tot dan in aanhouding bly.
Nico het homself verlede week aan die polisie oorgegee nadat André Gouws hom uitgewys het as die baasbrein in die sluipmoord van Chanelle.
Nico het Vrydag vir die eerste keer as ʼn amptelike verdagte in die Pretoriase streekhof verskyn in verband met die moord.
Chanelle is in November 2011 in Faerie Glen, Pretoria, deur twee mans op ʼn motorfiets doodgeskiet nadat sy haar seuntjie by die kleuterskool afgelaai het.
Gouws en Ambrose Monye is skuldig bevind vir hul aandeel aan die moord. Gerhardus “Doepie” du Plessis en Willem “Pike” Pieterse dien tans elk 18 jaar tronkstraf uit nadat hulle vroeër skuldig gepleit het op hul aandeel in die moord. Du Plessis en Pieterse was die twee mans op die motorfiets wat deur Monye gehuur is om Chanelle te skiet. Gouws het op sy beurt Monye gehuur wat met die skieters ʼn ooreenkoms aangegaan het. Gouws en Monye moet nog gevonnis word.
Lees alle berigte wat met die Henning-moordsaak verband hou, op Maroela Media.