Nie een Gautengse hospitaal voldoen aan veiligheidsvereistes

Steve Biko-hospitaal Foto: pah.org.za

Staatshospitale in Gauteng is in só ʼn beroerde toestand dat dit nagenoeg R6 miljard gaan kos om die hospitale se standaard in ooreenstemming met die Wet op Beroepsveiligheid te bring.

Die DA sê dié skokfeit het aan die lig gekom tydens ʼn voorlegging wat die Gautengse departement van gesondheid verlede week aan die provinsiale wetgewer gedoen het.

“Al 32 hospitale het duur bouwerk nodig. Dit wissel van R11 miljoen vir die Rahima Moosa-hospitaal, tot ʼn verstommende R810 miljoen wat nodig is vir die Chris Hani-Baragwanath-hospitaal in Soweto,” het Jack Bloom, die DA-woordvoerder oor gesondheid in Gauteng, in ʼn verklaring gesê.

Kwessies wat dringend aandag benodig, sluit in bepalings oor masjinerie, elektriese installasies, brandbestrydingstoerusting, hysbakke, stoorkamers, uitgange, trappe en gange.

Bloom sê bitter min geld hiervoor is in die driejaar-mediumtermynbegroting beskikbaar gestel, maar dat die departement nou vir R1,7 miljard vra om die tien swakste hospitale in die provinsie reg te ruk. “Ek twyfel of die geld beskikbaar gestel gaan word, veral gegewe die Nasionale Tesourie se begrotingsinkorting.”

Hy sê dat jare se swak instandhouding veroorsaak het dat nie ʼn enkele Gautengse staatshospitaal aan veiligheidsmaatreëls voldoen nie.

“Nie een van dié hospitale sal deel kan vorm van die regering se beplande Nasionale Gesondheidsversekering (NGV) nie, omdat dit eers deur die kantoor van die toepassing van gesondheidstandaarde geakkrediteer sal moet word,” sê Bloom.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Karl

en volgende is die skole in Gauteng.

Johan

En dan wil die Regering die res van die werkende gesondheidsdiens kaap! Hulle is onbeholpe

Marinda

As mense net begin besef dat alles onderhou moet word om dienste te kan lewer, sal dit al een stap in die regte rigting wees!

Ek Vra maar net

Mediese dienste en opvoeding is baie belangrike aspekte. Waarom word daar nie aandag geskenk aan hierdie staats instansies nie?

Johan

Die mense verandwoordelik vir die agteruitgaan van die hospitale moet in my opinie krimineel aangekla word en tronkstraf uitdien, want hulle mors die belastingbetalers se geld en hulle vernietig staats eiendom wat op sy beurt aan die mense van die land behoort. Dit is uiters onaanvaarbaar!