Niemand nog vas ná moord op Lindley-boer

Christian van Tonder, ‘n jong Vrystaatse boer, is in Gauteng doodgeskiet. (Foto: Facebook)

Niemand is nog in hegtenis geneem in verband met die moord op ʼn jong boer van Lindley in die Vrystaat wie se liggaam Maandagaand in die Barrage-omgewing in Gauteng gevind is nie.

Christian van Tonder (29) is glo ʼn enkele keer geskiet.

Sers. Nombulelo Mohlakoana, polisiewoordvoerder, sê ʼn lid van die polisie se misdaadintelligensie-eenheid het op die jong boer se liggaam afgekom en die polisie ontbied. Van Tonder was nog in sy bakkie en sy selfoon is op die toneel gevind.

Van Tonder het vroeër vir Jaco Botha, ʼn veeaankoper, vir ʼn sakevergadering in die omgewing  ontmoet. Mohlakoana sê volgens Botha het hy Van Tonder ná 17:00 die laaste keer lewend gesien.

Van Tonder, ʼn derde geslag- boer, het in die Oos-Vrystaat met Drakensberger-beeste geboer en het die boerdery ná die dood by sy pa, Colyn, oorgeneem.

Van Tonder word ook oorleef deur sy ma, Risa, en suster, Elsari Cronjé.

Die moord het opnuut skokgolwe deur die Vrystaatse boerderygemeenskap gestuur en kom kort ná die dood van Johan Prinsloo (73), ʼn boer in die Koppies-distrik.

Prinsloo is gisteroggend op sy kleinhoewe doodgeskiet nadat ʼn gewapende man op hom en sy plaaswerkers losgebrand het. Prinsloo het op die toneel gesterf.

In nog ʼn voorval is ʼn gesin ook Maandagoggend op hul plaas naby Bothaville oorval en beroof.

Die aanvallers is die plaashuis binne waar hulle Willie Coetzer (29), sy vrou, Elé (29), sy skoonpa, Gottlieb Venter (59), en ʼn huiswerker oorval het. Die egpaar se babadogtertjie was ook in die huis.

Twee van die vermeende aanvallers is reeds aangekeer.

Jan van Niekerk, VF Plus-leier in die Vrystaat, sê die aanvalle maak dit opnuut duidelik dat landelike beveiliging nie ʼn prioriteit vir die ANC-regering is nie.

“Om hierdie soort misdaad te bekamp is dit belangrik dat die polisie se landelike beveiligingsplan doeltreffend in werking gestel word en polisiestasies met die nodige hulpbronne toegerus word.”

Die party het opnuut ʼn beroep op boere en landelike gemeenskappe gedoen om self veiligheidsmaatreëls te tref.

“Die party sal waar moontlik hulp verleen om die skuldiges op te spoor om toe te sien dat geregtigheid vir die slagoffers geskied.

“Die VF Plus spreek sy innige meegevoel uit met die slagoffers se familie en geliefdes en wens die Venter-gesin ʼn spoedige herstel toe,” sê Van Niekerk.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

22 Kommentare

jongste oudste gewildste
Swerwer

Landelikse veiligheid sal nooit ‘n prioriteit vir die ANC wees of word nie want hul sit daar agter.

marius

Die slang se kop moet verbrysel word . Punt

Manda

Wat van ‘n private vervolgingseenheid net vir plaasaanvalle? Ek is seker befondsing kan gedryf word op een of ander manier?

Jannie van Niekerk

Dis hoog tyd dat Rampspoedphosa erken dat daar plaasmoorde in SA is en dat ‘n veel erger en groter pandemie as Covid is.

Skappie

Elke dag lees ons van berugte van boere wat aangeval, of vermoor word. Wanneer gaan ons regering iets begin doen? Dit is lewwens wat geneem word, mense wat aan ons kos voorsien. Sterkte aan elke gesin, familielid, en vriende van die mense wat vermoor of aangeval is. Mag onse Liewe Heer julle styf vas hou in sy arms, deur hierdie moeilike tye. Mag ons regering hulle oogklappe afhaal, sodat daar strenger opgetree word aan die misdadegers.