Nelson Kgwete, woordvoerder van die departement van internasionale betrekkinge en samewerking, het bevestig die man is ongedeerd en het Maandagaand uit Nigerië vertrek. Die mans is glo vrygelaat nadat hul werkgewer ʼn onbekende bedrag as losprys betaal het.
Macmahon Holdings Limited, in wie se diens die mans is, het Sondag in ʼn verklaring gesê vyf van die mans is beseer, waarvan twee se beserings ernstig is. Hulle word deur ʼn span mediese spesialiste behandel. Die twee wat nie beseer is nie, is medies ondersoek.
“Reëlings is getref om die mans veilig terug te bring na hul gesinne, sodra hulle medies geskik verklaar is om te reis,” het die verklaring gesê. Sy van Dyk, uitvoerende hoof van Macmahon, het die mans geloof vir hul dapperheid tydens die beproewing.
“Ons manne is deur ʼn traumatiese ervaring en daarom het ons onmiddellik mediese- en ander ondersteuningspanne in Nigerië gemobiliseer om aan hul ondersteuning te verleen,” het hy gesê. Hy het gesê al sewe mans is die geleentheid gegee om met hul gesinne in verbinding te tree.
Van Dyk het gesê die maatskappy betreur die afsterwe van die plaaslike bestuurder, Matthew Odok, wat tydens die voorval dood is.
Die mans het versoek om nie geïdentifiseer te word nie.