Nkandla: ‘Stel waarnemende president aan’

Pres. Jacob Zuma

Pres. Jacob Zuma

Die Christen-Demokratiese Party (CDP) het Vrydag in ‘n verklaring die parlement versoek om ‘n tussentydse of waarnemende president aan te wys in lig van die nuwe verwikkelinge rakende die Nkandla-verslag.

Die CDP het gesê hy ondersteun die ministers in die veiligheidsgroepering se hofaansoek om die openbare beskermer se Nkandla-verslag aan hersiening deur die hof te onderwerp. “Dié hersiening sal eens en vir altyd beslis of die huidige bekleër van die amp van openbare beskermer onafhanklik is soos deur die grondwet vereis, en of sy ‘n vendetta teen die regering voer,” het ds. Theunis Botha, leier van die CDP, gesê.

“Ons het egter ‘n voorbehoud. Tot tyd en wyl die hof oor die saak beslis, sal dit uiters onvanpas wees om Jacob Zuma vir nog ‘n termyn as president in te huldig. Tegnies, tot dat die saak opgelos is, is daar nog geen uitsluitsel oor die integriteit en geskiktheid van Zuma om as president te dien nie. Ons doen daarom ‘n beroep op die parlement om ‘n tussentydse of waarnemende president aan te wys.”

Die Ekonomiese Vryheidsvegters (EFF) het intussen die ministers se besluit as ‘n ‘uitsteltaktiek’ bestempel. “… Wetend dat daar ‘n moontlikheid is dat die uitkoms van die parlementêre ad hoc-komitee se hersiening van die Nkandla-verslag kan lei tot ‘n mosie om die president te vervolg, wend die ministers hul nou tot ‘n onnodige en duur vertragingstaktiek,” het Mbuyiseni Ndlozi, woordvoerder van die EFF, in ‘n verklaring gesê.

Die DA het aangedui dat hy tans met sy regsverteenwoordigers konsulteer om moontlik as ‘n ingrypingsparty tot die geding toe te tree. James Selfe, leier van die DA se federale raad, sê die ministers se besluit is ‘n deursigtige geval van die uitvoerende gesag wat probeer om in te meng met die onafhanklikheid en onpartydigheid van ‘n instelling wat se magte onderskryf word in hoofstuk nege van die grondwet.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Peter Says ·

CDP, ons weet tog, dit sal nooit gebeur nie. Die sweep het geklap…

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.