NMMU-ouers begin klasaksie

Studente betoog op die kampus van Nelson Mandela Metropolitaanse Universiteit (NMMU) op 20 September 2016. Foto: Twitter via @Sparkey13

Studente betoog op die kampus van Nelson Mandela Metropolitaanse Universiteit (NMMU) op 20 September 2016. Foto: Twitter via @Sparkey13

Bekommerde ouers van studente by die Nelson Mandela Metropolitaanse Universiteit (NMMU) het hulle nou tot die howe gewend in ʼn poging om die instansie weer te heropen.

Die nuutgevormde Concerned Association of Parents and Others for Tertiary Education (Captu) het Woensdag in Port Elizabeth vergader om hul planne vir ʼn klasaksie-regsgeding te bespreek. Die regsroete is geopper nadat 4 500 mense ʼn aanlyn-petisie getiteld “Onwettige betogings skend ons reg op onderwys” geteken het. Die petisie is deur die bekende Port Elizabethse advokaat Terry Price begin.

Brin Brody, ʼn prokureur van Grahamstad, het Woensdag op die Captu-vergadering gesê die eerste stap is om ʼn aanmaningsbrief aan NMMU te stuur waarin die groep eis dat die universiteit heropen word en dat studente se veiligheid verseker word.

“Ons siening is dat die universiteit verplig is om te heropen, hulle is verplig om hulle tot die SAPD en veiligheidsmaatskappye te wend om na die studente (se veiligheid) te om te sien en hulle is verplig om voort te gaan met kampusbedrywighede ingevolge die Wet op Verbruikersbeskerming,” het Brody gesê. “Ons glo die universiteit kan heropen op dieselfde grondslag waarop die ander universiteite heropen het, waarvan die Rhodes-Universiteit in Grahamstad net een voorbeeld is.”

Indien die universiteit nie op die aanmaningsbrief reageer nie, sal prokureurs wat Captu verteenwoordig die hooggeregshof in Grahamstad nader om ʼn dringende aansoek te bring dat die hof ʼn interdik moet uitreik wat die NMMU verplig om sy deure te open.

Brody het gesê volgens sy navorsing het die ouers ʼn sterk saak en indien hul hofaansoek suksesvol is, sal dit ʼn beginsel wees wat ook op ander universiteite toegepas kan word.

Hy het gesê die NMMU is “in ʼn gevaarlike posisie” aangesien studente die universiteit vir miljoene rande kan dagvaar op grond van die instansie wat nie sy kontraktuele verpligting nakom nie en potensiële verlies aan inkomste vir studente wat van korporatiewe betrekkings verseker is sodra hulle hul studies voltooi het.

“My kliënte is ouers, studente en ander groepe wat graag wil voortgaan met hul studie op grond van kontrakte wat gesluit is en klasgeld wat hulle betaal het om aan die universiteit te studeer. As die universiteit sluit, sal daar enorme skade wees, nie net vir die individue nie, maar ook vir die universiteit self,” het Brody gesê.

“Indien ʼn student van ʼn betrekking verseker is nadat hy graad gevang het en hy verloor daardie werk omdat hy nie sy studie kan voltooi nie, sal daar ʼn skadevergoedingseis teen die universiteit ingestel word. Dit sal nie net vir studiegeld wees nie, maar ook vir verlies aan inkomste, wat beteken die probleem sneeubal net al hoe verder. Ons rol is om as regsverteenwoordigers vir ons kliënte op te tree. Hierdie is nie ʼn politieke saak nie, dit is ʼn regsaak.”

Vandeesweek was die derde week wat die NMMU heeltemal gesluit was weens die gewelddadige #FeesMustFall-betogings op sy kampusse. Die universiteitbestuur het vroeër gesê indien die kampusse nie teen Maandag heeltemal heropen nie, sal die hele akademiese jaar in die slag bly.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
Dries

Wel gedaan , hoop meer ouers en algemene publiek raak so betrokke . So sal ons hierdie terroriste beveg , die ou leuse is “EENDRAG MAAK MAG”

Jean

Wonderlik, kom ons kyk wie die Universiteit nou gaan kies, die oproerige skare of die studente wat wil studeer en siviele eise van miljoene teen hulle gaan instel. Dit lyk tans asof hulle nie werklik omgee vir diegene wat wil studeer nie, maar ingee tot ‘n minderheid betogers. Dalk as dit hulle geld gaan begin kos, gaan hulle wakkerskrik.

Johann

Lekker. Jammer dat dit tot so iets.moet kom; maar LEKKER! Hoop die ander mammas en pappas van die ander Universiteite volg. Wat my steeds oorbluf is dat die werklike studente nie ook hulle voete neersit(letterilik) neersit nie!

Danie

Baie mooi!

pieter

Hoogtyd dat die ouers se stem gehoor word want dis hulle geld en ons belastinggeld wat gemors word deur onopgevoede studente wat geen benul het van waardes nie.