Rand Water het die Tshwane-metroraad ingelig dat noodherstelwerk aan ʼn lekkende pypleiding gedoen moet word. Die pyp voorsien water aan verskeie reservoirs in die Tshwane-metrogebied en ander munisipaliteite.
Die Tshwane-metroraad sê die herstelwerk gaan minstens 24 uur duur en begin Saterdag om 13:00. Herstelwerk sal na verwagting tot Sondag 13:00 duur.
In dié tyd is daar ʼn groot moontlikheid dat verskeie buurte sonder water gaan sit.
Dit sluit in:
- Centurion
- Kosmosdal
- Mnandi
- Rooihuiskraal
- The Reeds
- Bakenkop
- Sunderland Ridge
- Raslouw
- Erasmia
- Valhalla
- Loulardia
- Laudium
- Atteridgeville
- Pretoria-Wes
- Pretoria se sakekern
- Suiderberg
- Clifton
- Brakfontein
- Hercules
- Wonderboom
- Ga-Rankuwa
- Mabopane
- Winterveld
- Soshanguve
- Ga-Rankuwa-nywerheidsgebied
Vrydag het die metroraad gesê die buurte Sunnyside, Salvokop, Arcadia, Clydesdale asook die suidelike dele van die middestad, gaan óók waarskynlik etlike dae lank sonder water wees nadat ʼn pyp, wat verlede jaar ook probleme gegee het, Donderdag gebars het.
Duisende kiloliter drinkwater het daaruit gestroom.
Om die waterverliese te beperk en sodat herstelwerk behoorlik gedoen kan word, is die reservoir Donderdag om 22:00 buite diens gestel.
Die stad het gesê hy stuur tenkwaens met water na die geraakte gebiede.
Herstelwerk aan dié pypleiding kan tussen vier en sewe dae duur.