Nóg eis majoor se kop oor ‘haatspraak’

Majoor MV Mohlala. Foto: Via Facebook

AfriForum sowel as die VF Plus het Donderdag hul gewig agter die DA ingegooi en geëis dat daar strenger opgetree moet word teen ʼn majoor van die Suid-Afrikaanse Nasionale Weermag (SANW) wat slegs berispe is nadat hy hom glo aan haatspraak skuldig gemaak het ná ʼn aanval op twee wit bejaardes.

Maroela Media het Dinsdag berig Johan van Wyk, ds. Braam van Wyk (80) se seun, het op 10 Maart ʼn foto van sy pa se erg aangerande gesig op Facebook gedeel ná ʼn aanval vroeër die dag in Ysterhoutweg in Randparkrif in Randburg.

“Watter lafaards skop ʼn 80-jarige man in sy gesig terwyl sy hande agter sy rug vasgebind is? Hulle het ook sy vriend, afgetrede prof. Kobus Naude wat ʼn wonderlike man was, vermoor deur hom met ʼn mes in sy hart te steek. Hulle het met my pa se wit Mercedes-Benz C220 met die registrasienommer 004 MVW GP op vlug geslaan,” het Van Wyk in sy inskrywing gesê.

Sy plasing is wyd op sosiale media versprei en sowat 20 000 keer op Facebook gedeel.

Maj. MV Mohlala, verbonde aan die Wonderboom- militêre basis, het glo in reaksie op Van Wyk se plasing die aanvallers se optrede goedgekeur. Op sy Facebook-profielfoto wat by die inskrywing verskyn het, sit hy in sy weermaguniform met sy naam op ʼn plaatjie op sy bors aangebring.

“Die aanvallers moes sy oë en tong uitgesteek het sodat die laaste gesigte wat hy ooit sou sien, dié van die moordenaars sou wees en hy na sy graf kon gaan met die nagmerrie,” lui die beweerde inskrywing wat sedertdien verwyder is.

Hy het glo ook gesê: “Apartheid is in hom [Braam]. Al hierdie ou wit mense dink ons is onnosel as hulle sê hulle was teen apartheid gekant. Ons sal nie vergeet wat hulle gedoen het nie. Nou is dit die wit mense se beurt.”

Brig.genl. Mafi Mgobozi, die weermag se woordvoerder, het aan Maroela Media gesê Mohlala is reeds verlede week oor die plasing berispe toe dit onder die weermagbestuur se aandag gebring is.

“Hoewel hy die plasing in sy private hoedanigheid gemaak het, is hy tot orde geroep en gewaarsku om nie sulke uitlatings te maak nie, want dit skaad die weermag se beeld. Hy is gewaarsku om die plasing te verwyder en nie weer sulke uitlatings te maak nie, anders sal tugstappe gedoen word,” het Mgobozi gesê.

Die DA het Maandag aangedui hy gaan Mohlala by die Menseregtekommissie (MRK) verkla en het ʼn skrywe aan Nosiviwe Mapisa-Nqakula, minister van verdediging en militêre veterane, gerig om haar te versoek om “bewerings van haatspraak en rasgebaseerde opsweping tot geweld” teen Mohlala te ondersoek.

AfriForum het Donderdag gesê die burgerregtewaghond het Mapisa-Nqakula 90 dae gegee om redes te verskaf waarom daar nie behoorlik teen Mohlala opgetree is nie.

“Mohlala het uitlatings gepubliseer wat uiters kwetsend, rassisties en nadelig is en binne die definisie van haatspraak val,” het Willie Spies, AfriForum se regsverteenwoordiger, in ʼn verklaring gesê.

“Mohlala se uitlatings kom duidelik op haatspraak neer. Artikel 105(1) van die Suid-Afrikaanse Nasionale Verdedigingswet (Wet no. 42 van 2002) bepaal ook dat dit as ’n strafregtelike oortreding gedefinieer word wanneer enige lid van die SANW woorde uiter of optrede ten toon stel wat neerkom op vyandigheid, afgunstigheid of vernedering van enige persoon gebaseer op sy ras, geslag, ouderdom, taal of kultuur. Volgens dié wetsbepaling kan ’n persoon wat aan sodanige misdryf skuldig bevind word tot vyf jaar gevangenisstraf opgelê word. Die plaaslike bevelvoerder van die eenheid waar Mohlala gestasioneer is, het egter nie verder teen Mohlala opgetree nie en hom bloot berispe en vermaan om nie die SANW se beeld in onguns te bring nie.”

Die plasing wat Johan gemaak het.

Spies het gesê die doel van AfriForum se skrywe is om die minister geleentheid te gun om redes te gee vir die besluit om nie strafregtelik teenoor Mohlala op te tree nie, aangesien AfriForum beplan om die minister se besluit op geregtelike hersiening te neem indien daar onvoldoende redes vir dié besluit bestaan.

Die nuus van Mohlala se uitlatings kom in dieselfde week waarin die eiendomsagent, Vicki Momberg, vir twee jaar tronk toe gestuur is omdat sy ʼn polisiebeampte rassistiese skeldname toegesnou het.

Volgens Spies is albei voorvalle ewe onaanvaarbaar, maar is dit “skreiend dat Mohlala skotvry met haatspraak wegkom op ʼn weerlose bejaarde wat ʼn slagoffers was van geweldsmisdaad was terwyl ʼn wit vrou wat ʼn swart persoon skeldname toegesnou het vir twee jaar tronk toe gestuur word”.

“AfriForum sal alles in sy vermoë doen om die oneweredige toepassing van regsreëls te beveg en toe te sien dat gelykheid voor die reg bevorder word en sekere persone nie op grond van ras swaarder as ander gestraf word nie,” het Spies afgesluit.

Dr. Pieter Groenewald, VF Plus-leier, het Donderdag gesê die party het besluit om Mohlala by die gelykheidshof aan te kla.

“Die VF Plus beskou hierdie uitlatings as haatspraak. Dit is baie ernstig veral oor die feit dat Mohlala ʼn lid van die weermag is en soldate geensins politieke uitsprake kan maak nie aangesien hul integriteit bo verdenking moet wees om alle mense in Suid-Afrika sonder vooroordeel te verdedig,” het hy in ʼn verklaring gesê.

Groenewald het gesê in die lig van die Vicki Momberg-uitspraak sal die VF Plus toesien dat dieselfde maatstawwe nou ook toegepas word op Mohlala aangesien rassisme van enige aard, ongeag jou ras, onaanvaarbaar is en as sodanig beoordeel moet word.

“Indien daar ʼn voorbeeld gemaak is van Momberg, moet daar ook ʼn voorbeeld gemaak word van Mohlala om ʼn sterk boodskap uit te stuur na die gemeenskap en veral aan alle lede van die weermag dat hulle altyd apolities en onpartydig moet wees,” het Groenewald gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Vermeendes

Ons voel vere vir hoe sy werk hom straf, rassisme is mos n krimenele oortreding en verdien tronkstraf soos Vici Momberg.

N Lourens Reitz

“hoewel hy die plasing in sy privaat hoedanigheid gemaak het” maar hy sit daar in sy ” uniform ” in sy kantoor op by die werk op die weermag se perseel en dit alles in sy privaat hoedanigheid ???

Lana

Hallo. Gedink ons sal “majoor” Mohlala weer op dié platform sien.
Nou sal ons sien hoe die standaard wat gestel is in die Vicki Momberg-saak op Mohlala ook van toepassing is!!

Lolla

Vicki was ook in haar privaat hoedanigheid! Sy was n teiken van swart kriminele. Is hulle ooit gevang?! Wie het wat krimineel teenoor arme bederfde, bevoordeelde en bemagdigde swart majoor gedoen?

White Rhino

Mooi manne – jip! kla hom aan!!!