Muller Steyn (Foto: Facebook)
Daar was teen Woensdag nog geen teken van Muller Steyn (17) wat tydens ʼn vakansie saam met sy gesin in die see in Mosambiek verdwyn het nie.
Muller en sy 16-jarige nefie het Sondag by die see in Quinjata, Inhambane gaan swem toe die twee tieners in ʼn systroom beland het. Die nefie kon met die golwe weer terugswem strand toe, maar Muller het in die water verdwyn.
Muller is saam met sy pa Arno, ma Nanette en sussie Kayla in Mosambiek.
Cindy Fouche, ʼn vriendin van die familie, het op Facebook gesê ʼn helikopter, bote, jetski’s, hommeltuie en sweeftuie is ingespan om met die soektog te help. Alle pogings om Muller op te spoor, was egter tot dusver tevergeefs.
Muller is vanjaar in matriek by die Hoër Tegniese Skool Middelburg.
