Nog geen teken van vermiste skaakafrigter

Stan Davies (Foto: Facebook)

Stan Davies (30), ʼn skaakafrigter van Johannesburg, word steeds vermis nadat hy in Desember verdwyn het.

Laura Irving, Davies se vriendin, het Donderdag aan Maroela Media gesê hulle het nog niks van Stan gehoor nie. “Sy bankrekening is gesluit en hy lees nie sy e-posse nie,” het sy gesê. Sy selfoon is ook afgeskakel. Irving het bygevoeg daar is ook nog geen inligting van die polisie nie. “Hulle bel soms en vra vreemde vrae, soos of ons Stan se nuwe telefoonnommer het, of waar hy hom bevind.”

Maroela Media het in Desember berig Stan het spoorloos verdwyn kort nadat hy vir Irving ʼn boodskap gestuur het om te sê hy vermoed hy word agtervolg. Hy met die Gautrain van Rosebank na Hatfield gery om by die Universiteit van Pretoria te gaan navraag doen oor moontlike verdere studies. Sy foon se battery was egter pap en Irving het versoek dat hy haar sal laat weet sodra hy veilig by die universiteit is. “Dit was die laaste keer wat ek van hom gehoor het. Ons weet nie of hy met iemand spesifiek daar ʼn afspraak gehad het en of hy ooit daar uitgekom het nie,” het sy toe gesê.

Stan was vyf jaar gelede ʼn onderwysstudent en wou uitvind hoe hy te werk moet gaan om verder te studeer. Sy familie, wat in die Kaap woon, het glo ook nog niks van hom gehoor nie.

Jason Stanleigh (Stan) Davies het kort, bruin hare en ligte groen oë en is ongeveer 1.7 m lank. Enigiemand met inligting kan die polisie skakel by 08600 10111.