Nóg klagtes kom teen BLF-leier

Andile Mngxitama, BLF-president. Foto: Skermskoot/kykNET-video

Die Menseregtekommissie (MRK) het bevestig hulle het klagtes ontvang oor die president van Black First Land First (BLF) se uitlatings die afgelope naweek tydens dié party se verkiesingsbekendstelling in Potchefstroom.

“Die DA gaan Andile Mngxitama by die MRK en die gelykheidshof verkla ingevolge die Wet op die Bevordering van Gelykheid en Voorkoming van Onregverdige Diskriminasie oor uitlatings waarin hy geweld teen wit Suid-Afrikaners aanhits,” het Solly Malatsi, die DA se nasionale woordvoerder, Maandag gesê.

Gail Smith, MRK-woordvoerder, het intussen by navraag aan Maroela Media bevestig hulle het reeds klagtes oor Mngxitama se toespraak ontvang, wat volledig in ʼn video te sien is wat die party op YouTube gelaai het.

Dr. Pieter Groenewald, VF Plus-leier, beplan om Dinsdag om 11:00 ʼn klag teen Mngxitama by die Potchefstroomse polisiestasie in te dien, terwyl AfriForum sy regspan opdrag gegee het om hofstukke op te stel om Mngxitama by die gelykheidshof van haatspraak aan te kla.

Ons kan nie toelaat dat Mngxitama se uitlatings en optrede sonder beswaar verbygaan nie.

Benewens die DA se klagtes by die MRK en die gelykheidshof sal die partyleier in Noordwes, Joe McGulwa, klagte van die aanhitsing van dreigende geweld teen Mngxitama aanhangig maak, want “ons kan nie toelaat dat Mngxitama se uitlatings en optrede sonder beswaar verbygaan nie”, sê Malatsi.

Mngxitama het Saterdag na aanleiding van die sakemagnaat Johann Rupert se dreigement om die taxibedryf te mobiliseer om hom teen die EFF se dreigemente te beskerm, gesê vir elke swart mens wat in so ʼn konflik sterf, sal sy party “vyf wit mense doodmaak”.

“Die nie die eerste keer dat BLF en hul leier kniediep in aantygings van haatspraak beland nie,” sê Malatsi. “Dié gedrag is beslis ʼn karaktertrek van BLF, soos duidelik sigbaar is in hul optrede van die afgelope twee jaar.”

Die MRK het BLF vroeër vanjaar van haatspraak beskuldig en aanbeveel dat die party daarvan weerhou word om aan volgende jaar se verkiesing deel te neem.

Ek strewe daarna om wit mense dood te maak, en dit moet bereik word.

Lindsay Maasdorp, BLF-woordvoerder, het vanjaar getwiet hy strewe daarna om wit mense dood te maak. Foto: Facebook

Die BLF-woordvoerder Lindsay Maasdorp het by ʼn ander geleentheid onder skoot gekom vir ʼn inskrywing op Facebook en ʼn twiet waarin hy geskryf het: “Ek strewe daarna om wit mense dood te maak, en dit moet bereik word.”

Ook vanjaar het BLF-lede ʼn vroueprokureur as ʼn rassis gebrandmerk. Toe EWN Mngxitama daaroor uitvra, het hy gesê hy weet nie waarom hulle haar daarvan beskuldig het nie, maar hy was ten gunste van hul optrede en sou hulle glo, ongeag wat hulle sê.

BLF skram ook nie weg van anti-Semitisme nie, want in 2017 het Mngxitama getwiet: “Die nalatingskap van die Jodeslagting is nie net sleg nie; dink aan die lampskerms [vervaardig van slagoffers se vel] en Joodse seep [van slagoffers se liggaamsvet].”

Wendy Kahn, nasionale direkteur van die Suid-Afrikaanse Joodse Raad van Afgevaardigdes, sê die raad wil die BLF-leier in die hof laat vervolg vir haatspraak, teistering en onregverdige diskriminasie. In reaksie op die raad se optrede, het Mngxitama gesê hulle toon “white supremacist tendencies”.

Solly Malatsi, nasionale woordvoerder van die DA. Foto: Facebook

Malatsi sê Suid-Afrika behoort aan almal wat daarin woon. “Daar is geen plek vir rasgebaseerde aanhitsing van geweld nie. Diegene wat hulle aan haatspraak skuldig maak, moet ondersoek en met die volle mag van die wet vervolg word.”

In die jongste moontlike optrede teen BLF het Solidariteit Maandag bekend gemaak dat hy die Onafhanklike Verkiesingskomitee (OVK) gaan nader om ʼn klag teen BLF in te dien om die party te stuit om aan volgende jaar se verkiesing deel te neem.

Volgens Solidariteit stel die Wet op die Verkiesingskommissie in artikel 16(1)(c) dit duidelik dat die hoofverkiesingsbeampte geen aansoek om as party in ʼn verkiesing te registreer mag toestaan as die party hom skuldig maak aan aanhitsing tot geweld of diskriminasie op grond van die algemeen aanvaarde verbode kategorieë nie.

Volgens Connie Mulder, hoof van die Solidariteit Navorsingsinstituut, is dit “absurd” dat ʼn party, waar sulke uitlatings die norm is, enigsins deel uitmaak van die openbare diskoers, wat nog te meer aan verkiesings deelneem.

“Geen politieke leier wat met trots op ʼn verhoog aankondig dat mense vermoor sal word, moet naby aan ʼn magsposisie toegelaat word waar hy hierdie aksies kan uitvoer nie,” sê Mulder. “ʼn Party wat ʼn mandaat van moord soek, mag nie toegelaat word om aan die demokrasie deel te neem nie.”

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Kolle

BLF is erger as EFF. Niks gaan van die klagtes kom en hulle voel ‘n veer oor die gekerm. Die boodskap het klaar onder die massas versprei, soos die plan is. Never underestimate the power of stupid people in large groups.

realis

Machiavellianisme op sy beste. “All is fair in love and war and South African politics”.

leser

nou is daar ‘n vraag aan die slimmes, na aanleiding van die woorde in vandag se kommentaar;
“die wet op Verkiesingskommisie in artikel 16(1)(c) is dit duidelik dat die hoofvekiesingsbeampte geen aansoek om as n party in n verkiesing te registreer as die party hom skuldig maak aan aanhitsing tot geweld of diskriminasie op grond van die algemeen aanvaarde kategoriee”,
hoe kry julius mal lemme dit reg om ‘n party gestig te kry

Emma

Nou sal ons sien hoe dit gaan uitspeel. Kla hom aan hulle is n klomp rassiste soos die eff. Die wittes raak ook nou gatvol vir hulle uitsprake

lewies

Kan ons toelaat dat Mngxitma en sy volgelinge wat swartmense is martelaarstatus kry? Te oordeel aan sy optrede is dit presies wat hy wil he. Hofsake wat hulle gaan verloor gaan meehelp om hierdie status te verseker. Die woorde is gespreek en uit sy mond uit, dit kan nie herroep word nie. Die ergste wat kan gebeur is hofkoste wat hulle moet terugbetaal. Die stembus is die enigste wat aan leiers sal wys dat hulle idee nie vir die meerderheid inwoners aanvaarbaar is nie.