Nóg ʼn DA-man loop oor na Mashaba se party

Herman Mashaba, voormalige burgemeester van Johannesburg.

Abel Tau, ʼn DA-raadslid wat sedert Desember kortstondig as tussentydse burgemeester van Tshwane gedien het, is die mees onlangse DA-lid om oor te loop na Herman Mashaba se nuwe politieke party.

Mashaba, wat tot verlede jaar nog as DA-burgemeester van Johannesburg gedien het, het Donderdag dié nuus in ʼn verklaring bekendgemaak. Mashaba is die stigter van The People’s Dialogue.

“Ek is baie in my skik om aan te kondig dat Abel Tau die mees onlangse Suid-Afrikaner is om by ons nuwe party aan te sluit,” het Mashaba gesê.

“Toe ek die nuwe party gestig het, het ek dit duidelik gemaak dat ons nie ʼn tuiste sal wees vir politici wat ons mense in die steek gelaat het nie. Enigiemand wat by ons party aansluit, moet foutloos wees. Ek is van mening dat Abel Tau aan hierdie kriteria voldoen.”

Abel Tau, Thswane se tussentydse burgemeester. (Foto: Verskaf)

Hy sê Tau sal ʼn waardevolle bydrae lewer tot die koördinering van partystrukture in Tshwane. Volgens Mashaba het Tau besluit om by The People’s Dialogue aan te sluit omdat hy deel wil wees van ʼn beweging wat in staat is om die ANC-regering te onttroon en die lewens van Suid-Afrikaners te verbeter.

Tau is die jongste van ʼn rits DA-lede om by Mashaba se party aan te sluit. Ander DA-lede wat oorgeloop het, sluit in die voormalige streeksvoorsitter van Johannesburg, Funzile Ngobeni, en die DA veldtog-organiseerder Michael Beaumont. Die voormalige ANC-LP en fluitjieblaser Vytjie Mentor het ook onlangs by Mashaba aangesluit. Mashaba se party word amptelik op 29 Augustus bekendgestel.

John Moodey, DA-leier, het in ʼn verklaring gesê hy neem kennis van Tau se bedanking. “Die DA respekteer sy reg om die besluit te neem, hoewel ons dink dis ʼn verkeerde besluit. Ons wens hom nietemin sterkte toe met sy toekomstige ondernemings.”