Nog ʼn dag van beurtkrag aangekondig

Khulu Phasiwe, Eskom se nasionale woordvoerder, het op Twitter foto’s gedeel van betogers wat voorwerpe brand en paaie afsper (14 Junie 2018). Foto: Twitter via @KhuluPhasiwe

Fase 1-beurtkrag sal tot 21:00 vanaand ingestel word, aangesien die nasionale kragnetwerk steeds nie herstel het ná Donderdag se protesaksies nie.

Khulu Phasiwe, woordvoerder van Eskom, het gesê die kragvoorsiener was genoodsaak om beurtkrag vanaf 11:30 te implementeer aangesien sy kragopwekkingseenhede voortdurend uitskop.

“Voorvalle van intimidasie en sabotasie gaan vandag weer voort by Eskom se kragstasies. Hierdie voorvalle is besig om die bestendigheid van ons kragvoorsiening te bedreig,” het Phasiwe gesê.

Die kragvoorsiener het ook laat hoor dat beurtkrag oor die naweek hoogs waarskynlik is.

Eskom het Donderdagaand vir die eerste keer in ’n baie lang tyd beurtkrag ingestel nadat protesaksie deur ontevrede werkers die nasionale kragnetwerk onder druk geplaas het. Maroela Media het vroeër berig lede van die vakbonde NUM en Numsa het in groot groepe buite Megawatt Park in Johannesburg saamgedrom en betoog. Betogings is ook by verskeie Eskom-kantore en -kragstasies gehou.

Volgens die kragreus het die betogings gepaardgegaan met sabotasie en intimidasie en was daar verskeie voorvalle waar personeel aangeval is, paaie versper is en elektrisiteitsinfrastruktuur opsetlik beskadig is. Steenkoolaflewerings per pad is ook weens veiligheidsredes gestaak.

Phasiwe het Vrydag gesê Eskom het intussen ʼn hofinterdik bekom wat die intimidasie van werkers en kontrakteurs, die sabotasie van Eskom se infrastruktuur en die kaping van steenkoolvragmotors verbied.

Die ontevrede werkers eis ʼn salarisverhoging van 15%, maar Eskom is nie bereid om enige verhogings toe te staan nie weens die maatskappy se benarde finansiële situasie.

Die beurtkrag word volgens munisipaliteite se gepubliseerde beurtkragskedules ingestel. Direkte Eskom-kliënte kan Eskom se webtuiste besoek vir die beurtkrag-skedules.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Alida

Toe CR los die begragnisse uit en bring jou kant en stuur die weermag in om te help om die orde te herstel. Stemme is nou van geen belang nie wys jou ruggraat en doen iets.

Marinda

Hoekom word hierdie stakings toegelaat in die 1ste plek?

Jaco

Dankie Eskom. Ons hele bakery staan nou stil en alles het plat geval. Het 13 werkers om te betaal wat nou net sit. Besigheid is klein en moes alles sluit nou!!!!!!!!

Marcel

Waar in die lewe word jy toe gelaat om mense te laat staak vir 9% en 15% verhoging. As ek vra vir 15% kan ek maar gaan staak tot ek 100 jaar oud is ek sal dit nie kry nie. Jy moet bly wees as jy inflasie kry as jou verhoging, maar die president is mos klaar gestel……As jy nie kry wat jy wil hê nie, staak net en saboteer dan gee hulle in en betaal wat jy soek en ons belastingbetalers moet maar net smile and wave.

Stokkies

Hulle het destyds gese ons sal nie weer beurtkrag he nie.. maar eintlik het hulle geweet ons gaan moet, so al manier om dit toe te smeer is om n paar stakende werkers te blameer, wat in elk geval nie in die pad gaan gesteek word ten spyte van die “belangrike diens personeel mag nie staak nie” wetgewing.. ek hoop ek is verkeerd maar hier kom nog baie