Nog ʼn Ikeys-student deur haai aangeval

Foto: ER24

Foto: ER24

ʼn 19-jarige student van die Universiteit van Kaapstad is Saterdag by Buffelsbaai tussen Knysna en Sedgefield deur ʼn haai aangeval.

Declan Nurse, stasiebevelvoerder van die Nasionale Seereddingsinstituut (NSRI) in Knysna, het gesê Caleb Swanepoel se regterbeen is afgebyt tydens die aanval. Volgens Nurse was ʼn plaaslike dokter, Dee Richmond, ten tyde van die voorval saam met haar man op die strand en het sy Swanepoel begin behandel.

Swanepoel het ook diep snywonde aan sy linkerbeen opgedoen toe hy op sy branderplank deur ʼn haai aangeval is. “Caleb is deur ander branderplankryers uit die water gered. Die NSRI het met hul aankoms op die toneel behandeling oorgeneem en Caleb is op ʼn branderplank na die parkeerarea gedra waar ʼn ambulans van ER24 gewag het,” het Nurse gesê.

ʼn Helikopter is intussen ontbied en Swanepoel is na die Mediclinic George geneem vir verdere behandeling. Volgens Nurse is Swanepoel van Prins Albert en hy was saam met sy gesin met vakansie gewees. Nurse het gesê Swanepoel is vermoedelik deur ʼn grootwithaai aangeval.

Die 23-jarige Dylan Reddering, ook ʼn student aan die Universiteit van Kaapstad, is Vrydagmiddag deur ʼn haai aangeval by Look-out-strand in Plettenbergbaai (lees meer hier).

Argieffoto: Dr Berend Maarsingh/NSRI

Argieffoto: Dr Berend Maarsingh/NSRI

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Se Maar Net ·

Wat gaan nou aan met die haaie, dat hul so verdomp byterig raak???

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.