Nóg ʼn plaasaanval in Noordwes

Argieffoto: Maroela Media

‘n Egpaar is Sondagaand op ʼn plaas naby Makwassie in Noordwes deur gewapende aanvallers oorval toe hulle die hek voor hul huis oopgemaak het.

Lt.kol. Amanda Funani, woordvoerder van die polisie, het gesê twee verdagtes met vuurwapens het die egpaar by die hek voor hul huis oorval en hulle in die huis ingedwing. Daar het ʼn derde aanvaller sy verskyning gemaak. Al drie aanvallers het klapmusse gedra.

Volgens Funani het die verdagtes geld geëis. Sy het gesê ʼn buurman het tydens die rooftog by die huis opgedaag en die aanvallers het hom erg aangerand. Die aanvallers het daarna met selfone, kontant en ander items uit die huis op die vlug geslaan.

Marius Müller, nasionale veiligheidskoördineerder van AfriForum, het Sondagaand gesê een verdagte is ná die aanval in hegtenis geneem. Funani het bevestig ‘n verdagte word deur die polisie ondervra, maar het gesê hy is nog nie aangekla nie.

Volgens Funani is die buurman wat aangerand is na ʼn hospitaal geneem, maar was die egpaar ongedeerd. Sy kon nie die name of ouderdomme van die slagoffers bevestig nie.

ʼn Saak van huisroof en poging tot moord word ondersoek.

Hierdie is een van minstens ses plaasaanvalle in Noordwes sedert die begin van Mei. Blackie van den Berg (61) is Vrydag in die vroeë oggendure op haar plaas tussen Sannieshof en Ottosdal erg aangerand en verkrag.

BC Greyling (59), sy vrou Marlette (57) en BC se ma, Magdaleen Greyling (87), is op 16 Mei op ʼn plaas naby Sannieshof aangeval. BC sowel as Marlette is tydens die aanval geskiet en BC is op die toneel dood.

ʼn Man is op 9 Mei per helikopter na ʼn hospitaal in Johannesburg geneem nadat hy tydens ʼn aanval op ʼn plaas in die Assen-distrik buite Brits in Noordwes geskiet is. Gerrit Dercksen (51) is op 5 Mei op ʼn plaas in Soutpansdrift naby Brits deur drie gewapende mans oorval en aangerand.

Volgens Müller was daar Sondagaand ook ʼn aanval op ʼn plaas naby Derby waarby vier gewapende aanvallers betrokke was. Maroela Media wag vir meer inligting van die polisie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

30 Kommentare

jongste oudste gewildste
Ada

Maroela waarom se julle huisroof eerste en dan poging tot moord tweede. Is poging tot moord nie erger nie? Jy kan jou lewer verloor! Met huisroof nie.
Verduidelik asb asb my vraag want ek verstaan dit nie?

Ai man

Ai man, kan ons nie net 20 van die Britse Polisie wat die naweek se aanval hanteer het invoer nie. Binne 9 minute na die oproep was die aanvallers uitgevat!!!! Dit is al hoe hierdie goed kan stop.

Ai

Roof is n bysaak. Hierdie is terrorisme. Die regering wil nie die grond terugkoop nie. Hulle verwag mense moet net padgee. Hierdie mense word gestuur om te terroreseer, geld en wapens is die cherry op die koek. Wat anders kan dit verduidelik?! Hulle wil dit net nie openlik verklaar soos Mugabe nie.

Tyd dat Afriforum ophou die regering vra vir beskerming vir die Boere, dit gaan nie gebeur nie. Tyd vir n ander plan.

Uvonka

Ek wil nie so voel nie maar haat vir die mense oorweldig my elke dag meer en meer! Skuus vir die buurman wat seergekry het!

Theresa

Laat die wêreld weet. Ons wat hier lees, weet nou – nou moet eerste wêreld vertel word.
Sterkte aan die getraumatiseerdes. Dis vreeslik om so gekastei te word deur wreedaards met geen waarde vir enige iets nie – ook nie ander se lewens nie. Geen respek nie – beslis nie vir ‘n lewe nie of hulself nie.