Nog ʼn skool in Limpopo afgebrand

Skoliere staan en kyk hoe meubels afgelaai word by een van die skole in Vuwani, Limpopo wat erg deur betogers beskadig is. Foto: ANA

Skoliere staan en kyk hoe meubels afgelaai word by een van die skole in Vuwani, Limpopo wat erg deur betogers beskadig is. Foto: ANA

Nóg ʼn skool in Limpopo is aan die brand gesteek in die voortslepende betogings oor munisipale afbakeningsgebiede, het Des van Rooyen, minister van samewerkende regering, Dinsdag gesê.

Mawela Primary School by Masakona in die Sereni-nedersetting was die mees onlangse teiken van woedende inwoners wat hul verset teen die regering se planne om hulle by die nuwe Malamulele -munisipaliteit in te sluit.

Van Rooyen het tydens ʼn mediakonferensie in Polokwane dié voorval van brandstigting bevestig, maar gesê die regering kan nie inmeng met ʼn besluit van die Munisipale Afbakeningsraad nie. “Ons kan nie die besluit verander nadat die nuwe munisipaliteit reeds op die been gebring is nie,” het hy gesê.

“Gisteraand het ons die hartseer nuus ontvang dat nóg ʼn skool by Masakona afgebrand is. Dit is ʼn lafhartige daad wat tot nadeel van die land is.”

In die afgelope paar weke is meer as 20 skole afgebrand of erg beskadig deur betogende inwoners in Vuwani. Skoliere se skoolloopbane is onbepaald ontwrig terwyl die regering skarrel om mobiele klaskamers, meubels, boeke en skryfbehoeftes by die skole wat geraak word te laat aflewer.

Mpho Rambau, 'n Graad 12-leerder, by haar skool in Vuwani, Limpopo wat deur betogers aan die brand gesteek is. Foto: ANA

Mpho Rambau, ‘n Graad 12-leerder, by haar skool in Vuwani, Limpopo wat deur betogers aan die brand gesteek is. Foto: ANA

Van Rooyen het Dinsdag beweer dat mense in die gebied gretig is dat onderrig hervat word, veral ter wille van die 2 500 matrikulante wat vir hul Junie-eksamens voorberei. “Almal is toegewyd om ʼn vreedsame oplossing vir die probleem te vind. Die skoliere met wie ons vergader het, het dit duidelik gemaak dat as hul skole afgebrand word, word hulle toekoms ook geplunder,” het Van Rooyen gesê.

Van Rooyen en sy span het ook ʼn mediasie-span na die gebied gestuur om die sielkundige skade wat deur die gewelddadige betogings aangerig is te herstel.

Intussen is onderrig in die gebied steeds nie hervat nie, ten spyte van die feit dat 40 mobiele klaskamers en meubels al by skole afgelewer is. Die spanning in die gebied bly hoog wat veroorsaak dat onderwysers te bang is om vir werk aan te meld. Van Rooyen het gesê ʼn span is aangestel om in te gryp om die verhoudinge in die gebied te herstel, maar dit is nie duidelik hoe lank dit sal neem voordat skoliere weer agter die skoolbanke kan inskuif nie.

Lees alle vorige berigte oor die onrus in Vuwani op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Johann Marx

Afrika-demokrasie: Ek “vote” vir jou want jy’s familie…..en dan intimideer ek jou om te maak soos ek sê. En as jy nie luister nie…dan brand ek jou huis, jou skool, jou trein, jou familie. Ek sal vir jou bly stem…en ek sal jou bly brand tot ek my sin kry…al is dit hoe sinloos.

Ahooy

Ons bly in n siek land!!!

Magriet

Ons lees nerens wat gebeur met die kriminele nie. Hoe word hulle gestraf en hoe gaan hulle terug betaal? Duidelik sal hulle nie geld he nie. Ek stel voor lewens lange dwang arbeid om skole te bou. Daar moet dringend n voorbeeld gemaak word van hulle anders gaan dit net voort.

Elizabeth

Ek vra ook: hoekom hoor ons nooit dat iemand in hegtenis geneem word vir die afbrand van skole nie?? Nou moet die belastingbetaler weer nuwe skole bou. Ons tronke is oorvol: ontplooi almal wat vandaliseer lewenslank om op te bou wat hulle en hulle maatjies vernietig het. Miskien sal hulle dan ‘n idee vorm van hoe moeilik dit is om iets tot stand te bring. Laat hulle die fondasies met grawe en pikke grou, die stene met klei maak, sement maak en in die warm son bou … Ek twyfel enige iemand ‘n les daaruit sal leer, maar darem …

Popeye

‘ N lafhartige daad deur lafaards, bly die minister gebruik die regte benaming! Ons land word deur diesulkes bestuur ook.