Nog partye kap Ramaphosa oor uitlating

Pres. Cyril Ramaphosa lewer die David Rockefeller-gedenklesing by die Council on Foreign Relations in New York (24 September 2018). Foto: Elmond Jiyane/GCIS

Pres. Cyril Ramaphosa se uitlating tydens ʼn televisie-onderhoud met Bloomberg dat daar “geen moorde op boere” in Suid-Afrika is nie, het talle warm onder die kraag.

Agri SA het in ʼn verklaring gesê hy is ontevrede met Ramaphosa se stelling. “Plaasaanvalle en -moorde op alle boere, plaaswerkers en hul gesinne is ʼn reuseprobleem wat erken moet word,” het Dan Kriek, president van Agri SA, gesê.

Agri SA het ʼn beroep op Ramaphosa gedoen om as president van Suid-Afrika die nodige nuanse en feite weer te gee. “Die mate waartoe voedselprodusente en hul werkers aan brutale aanvalle uitgelewer is en word, kan nie weggepraat word nie. Volgens die jongste verslag van Agri SA het boere ongeveer R7,7 miljard in 2017 weens misdaad op plase verloor,” sê Kriek.

Die VF Plus se verklaring oor die aangeleentheid was sterker bewoord. Dr. Pieter Groenewald, leier van die VF Plus, het Ramaphosa se uitlating as “oneerlik en ʼn blatante leuen” bestempel en gesê dis ʼn jammerlike poging om die buiteland hieroor ʼn rat voor die oë te draai.

“Die president is óf totaal waningelig óf hy is besig met ʼn blatante poging om die Verenigde Nasies (VN) én die wêreld onder ʼn vals indruk te bring, veral oor plaasmoorde. Die feit dat die polisie self die statistieke oor plaasmoord en -aanvalle bekend stel, asook vorige polisieverslae oor plaasaanvalle, erken die werklikheid van plaasmoord en -aanvalle en dit maak dit onverstaanbaar dat die president van die land in ʼn staat van ontkenning daaroor is en die boere sodoende in die steek laat. Aan die een kant vertel hy hoe belangrik boere is, maar in die buiteland verraai hy hulle.”

Groenewald het gesê ʼn polisieverslag van 2003 oor plaasmoorde het bevind dat die redes vir plaasmoorde polities van aard is, dat dit oor die grondkwessie gaan, dat rassisme ʼn rol speel en dat gewone misdaad ook ʼn oorsaak is.

“Indien die president werklik eerlik wil wees teenoor die wêreld, moes hy eerder gevra het dat internasionale hulp verleen word om te kyk hoe ʼn bydrae gemaak kan word om misdaad in Suid-Afrika te bekamp, en in besonder plaasmoorde wat deels die oorsaak is van die gebrekkige landelike beveiligingstelsel en -strategie in Suid-Afrika.”

Groenewald het onderneem om die saak in die parlement te opper en sal aandring op ʼn verduideliking van die president oor hierdie onware stellings.

Louis Meintjes, president van TLU SA. Foto: Reint Dykema

Louis Meintjies, president van TLU SA, het gesê die waarheid word doelbewus verdoesel. “Waar die land se president aan hierdie blatante valshede kom, sal net die man in die maan weet. Duidelik is die president se begrip van brutale Suid-Afrikaanse werklikhede die gevolg van erg verdraaide ideologiese tonnelvisie. Hy lieg deur sy tande.”

Jaco Schoeman, voorsitter van die Afrikanerbond, het gesê die organisasie het met werklike ontsteltenis kennis geneem van Ramaphosa se ontkenning van plaasmoorde.

“Dit bly verstommend dat Ramaphosa die erns van die situasie met plaasmoorde ontken. Vir die buiteland word daar nou vertel daar is geen plaasmoorde nie. Verskeie statistieke skets ʼn somber prentjie in 2018 van misdaad oor die algemeen en dan plaasaanvalle en -moorde in die besonder.”

Schoeman het gesê die vraag kan met reg gevra word oor wat die regering met so ʼn leuenagtige aanslag en wanvoorstelling wil bereik. “Hulle kan dan mos nie meer vertrou word nie. Dit help weinig om pres. Donald Trump te verseker dat ‘hy hom nie oor Suid-Afrika hoef te bekommer nie’ as ons nie eens eerlik is met die ware feite in ons eie land nie.”

Die burgerregte-organisasie AfriForum het Donderdag aangekondig dat hy slagoffers wie se geliefdes tydens plaasaanvalle vermoor is na die VSA gaan stuur in ’n volgende fase van AfriForum se bewusmakingsveldtog teen plaasmoorde en onteiening sonder vergoeding.

Ernst Roets, adjunk- uitvoerende hoof van AfriForum, het Ramaphosa se stelling as ’n infame leuen bestempel en gesê dat dit ’n klap in die gesig van die meer as 10 000 mense is wat al op Suid-Afrikaanse plase aangeval is, asook die families van die ongeveer 2 000 slagoffers wat in dié plaasaanvalle vermoor is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

51 Kommentare

jongste oudste gewildste
Johann cb

As wat klassifiseer hy dan boere? Verstaan hom nou nie! Die boere voorsien ons van voedsel!

Waarheid

Nou kom die ware paddapotkoker na vore.hoop die libs se oe gaan nou oop.

J F Maritz

Bly om te hoor Dan Kriek praat nie net saam nie maar kom op vir die boere !
Jy kan dit verwag van C R pro populisme !

Johann

In your face… LIAR! Ciryl Ramaposa… ANC LEGACY of arrogant blatant LIARS!!!! SHAME IN YOU!!!!!

H

Ek wens ek kan voor hom staan en in sy gesig se hy se hy is gelowig dan lieg hy so
Stuur asb dit na jul fam, vriende en vra om te share.