Nóg strenger rookwette in vooruitsig

Met strenger wetgewing op takakprodukte en e-sigarette in die vooruitsig, is dit dalk nou die tyd om op te hou rook? (Foto: Freepik)

Die departement van gesondheid wil poog om nóg strenger wette teen rook in Suid-Afrika in te stel.

Lynn Moeng, ʼn hoofdirekteur in dié departement, het onlangs aan EWN gesê ʼn konsepwetsontwerp op die beheer van tabakprodukte en e-sigarette (Control of Tobacco Products and Electronic Delivery Systems Bill) is tans in die vooruitsig en dat die regering so vinnig as moontlik saamwerk om dit te prosesseer.

Die aanvanklike wetsontwerp wat pres. Cyril Ramaphosa reeds in 2018 goedgekeur het, het ten doel om rook in openbare plekke heeltemal te verbied.

Dit sluit in werkplekke, enige geslote ruimtes waar kinders teenwoordig is en private wonings wat vir sekere kommersiële aktiwiteite gebruik word as ook sommige oop openbare ruimtes.

Die wetsontwerp wil verder die gebruik, bemarking en verkope van e-sigarette of vaping-toestelle in Suid-Afrika reguleer. Die produkte funksioneer tans in ʼn wetgewende vakuum, het Moeng bygevoeg.

Tabakmaatskappye het reeds die voorgestelde wysigings teengestaan met verwysing na swak die openbare konsultasieproses en die skade wat die wetsontwerp die bedryf sal berokken.

Volgens Ntando Shadrack Sibisi, voorsitter van die Suid-Afrikaanse Tabaktransformasie-alliansie (SATTA) is daar meer as 21 000 kommentare op die wetsontwerp ontvang toe dit voorgelê is vir openbare kommentaar, maar die jongste weergawe van die wetsontwerp is onveranderd.

Die hele wettige tabakbedryf verkeer tans onder hewige druk met verliese aan inkomste en werkgeleenthede. Dit volg na die verbod op die verkope van tabakprodukte te midde van die Covid-19-pandemie verlede jaar in Suid-Afrika.

Die kleinhandelgroep Spar het gesê die verbod op sigarette het ʼn steeds ʼn negatiewe impak op die verkope.

Volgens BusinessTech toon Spar se tussentydse resultate vir ses maande wat op 31 Maart 2021 geëindig het dat alkoholverkope, wat ook nasionale verbied is, weer grotendeels herstel het toe die verbod verslap is.

Sigarette se verkope het egter gedemp gebly, selfs nadat die verbod op verkope opgehef.

Wil jy graag ophou rook?

Kliek op die infografika om dit te vergroot. (Grafika: Kansa)

Die Kankervereniging van Suid-Afrika (Kansa) het ʼn aanlyn program eKick Butt ontwikkel om mense wat wil ophou rook met inligting te ondersteun. Intekenaars kry ’n reeks e-posse, meningsopnames en aflaaibare materiaal wat hulle toerus om hul rookverslawing hok te slaan.

Volgens Lorraine Govender, Kansa se nasionale bestuurder vir gesondheidsbevordering, het rokers ondersteuning nodig om hulle verslawing stop te sit.

“Hierdie platform bied ondersteuning aanlyn en is gerieflik, aangesien mense vanaf enige plek en op enige tydstip toegang tot die program het. Verder bied dit jou ook die opsie om anoniem te bly.

“Die reis na gesondheid en vryheid van verslawing kan beslis makliker wees met die hulp van ʼn paar aanlyn vriende,” sê Govender.

Volgens Kansa se aanlyn meningsopname wil sommige mense ophou rook oor gesondheidsredes, ander is bekommerd oor die impak van tweedehandse rook op hulle kinders, families en ander nie-rokers, terwyl ander weens die prys van sigarette wil ophou rook.

Nóg redes om op te hou:

Kliek op die infografika om dit te vergroot. (Grafika: Kansa)

Om op te hou rook hou talle gesondheidsvoordele in, waarvan baie onmiddellik is en ander oor ʼn langtermyn voordelig is:

  • Na slegs 20 minute van ophou rook verlaag die hartklop.
  • Binne 12 uur keer die koolstofmonoksiedvlak in die bloed terug na normaal.
  • Binne twee tot 12 weke verbeter sirkulasie en verhoog longfunksie.
  • Binne een tot nege maande verminder hoes en die gevoel van kortasem.
  • Binne vyf tot 15 jaar word die risiko vir ’n beroerte verminder tot dié van ’n nie-roker. Binne tien jaar is die kanse vir sterfte weens longkanker omtrent die helfte van dié van ’n roker.
  • Binne 15 jaar is die risiko vir hartsiekte dieselfde as dié van ’n nie-roker.

Daar word gereken dat tabakprodukte jaarliks vir agt miljoen sterftes verantwoordelik is en ook ’n groot risikofaktor vir nie-oordraagbare siektes soos kanker, kardiovaskulêre siekte, asemhalingsiekte en diabetes is. Mense met hierdie kondisies is ook meer vatbaar vir erge Covid-19.

Nuttige hulpbronne:

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

49 Kommentare

jongste oudste gewildste
JohanR

En die ANC en die polisie gaan die wette poliseer….. gaan verby!

Boerkind

Geen probleem met totale uitwissing van rook nie, maar die manier van doen is nogal agterdogtig. Die regering wil nou die besluit VIR jou gsondheid neem, namens jou – wat dan volgende? Dieselfde regering besluit ook dat ‘n ongebore baba geaborteer kan word – lyk of rook belangriker as lewe is??

Persheks Adri

Gelukkig rook ek by my huis buitekant nie in my voertuie nie nog minder soos ‘n skêr in die straat. Laat julle hakke raas ek pla niemand nie en is ‘n ordentlike roker!

O ja en ek rook nie kopdoek se cheap sigarette nie ek’t klas!

Samuel

Sentrale en totale beheer. Dit is die crux van die saak. Die staat dink vir jou, soos destyds in die weermag. Dept van Gesondheid voel vere vir ons.

Francois Le Cochon

Goeie nuus, Weereens ‘n bewys dat die doel van wetgewing (sedert die Romeinse tyd) is om mense teen hulself te beskerm.