Inwoners het nooddiensbeamptes Vrydag verhoed om ʼn brandende gebou in Johannesburg se middestad te betree, omdat daar glo misdadigers in die gebou woon.
“ʼn Brand het omstreeks 15:30 by die sewe verdieping hoë gebou op die hoek van Kerk- en Endstraat uitgebreek,” het ao Gordon Billing, woordvoerder van die polisie, gesê.
Persone wat buite die gebou gestaan het, het nooddiensbeamptes verhoed om die gebou te betree. Eers toe polisiebeamptes by die toneel opgedaag het, kon personeel die gebou betree, het Robert Mulaudzi, woordvoerder vir Johannesburg-nooddienste, gesê.
Billing sê daar het glo misdadigers in die gebou gewoon.
“Elf mense is na Hillbrow-hospitaal geneem om behandeling te ontvang vir rookinaseming,” het Mulaudzi bygevoeg.
Die brand, wat op die grondvloer van die gebou uitgebreek het, is omstreeks 19:30 geblus.
ʼn Saak van openbare geweld is aanhangig gemaak. “Niemand is nog in verband met die voorval in hegtenis geneem nie,” het Billing bygevoeg.