‘Noodlanding’ toe polisie lus kry vir KFC

’n Vlieënier het glo met ’n polisiehelikopter by KFC op Komani geland om gou sy honger te stil. Foto: Google Maps

ʼn Inwoner van Komani (Queenstown) is die hoenders in nadat ʼn polisiehelikopter glo tussen motors en voetgangers op ʼn plaaslike winkelsentrum se parkeerterrein geland het omdat die vlieënier nie langer sy lus vir die Kolonel se geheime resep kon beteuel nie.

“Dit was nie ʼn amptelike polisietoetsvlug of vir enige polisiewerk nie,” meen Bill Harington, “maar net sodat die polisievlieënier kon land, die lemme afskakel en ewe ongeërg 30 m na die hoenderplek stap. Dus, nie om enige misdaadtoneel te ondersoek nie, maar om in die ry te staan vir ʼn vinnige wegneemete – en ʼn porsie sous[trein] daarby.”

Tot Harington se verbasing het die vlieënier sy kospakkie geneem, daarvoor betaal, terug na die helikopter gestap en vinnig weggevlieg.

Hy sê dit bekommer hom dat die vlieënier waarskynlik nie toestemming gehad het om op ʼn besige parkeerterrein met hope motors en mense reg rondom te land en so sy eie lewe en almal om hom sʼn in gevaar te stel nie.

“Hy het ongenooid gekom, sonder om vooraf sy landingstyd te reël of te vra dat die gebied afgesper word waar hy wou land,” beweer Harington. “Dit was nie ʼn amptelike SAPD-landing nie en ook nie ʼn noodlanding in die ware sin van die woord nie, benewens om gou in ʼn polisiehelikopter vir middagete te land.”

Harington sê dis onbekend waar die vlieënier vandaan gekom het of waarheen hy op pad was. “Kan ʼn mens bloot aanvaar dat ons belastingbetalers opgeleide polisievlieëniers moet finansier om brandstof, tyd en die salaris wat ons hulle betaal te verkwis om wederregtelik staatseiendom te gebruik om gou-gou ʼn wegneemete te koop?”

Kapt. Namhla Mdleleni, polisiewoordvoerder, sê sy kan nie kommentaar lewer op voorvalle waaroor geen klag aanhangig gemaak is nie. “Die inwoners moet ʼn klag by die polisie op Queenstown indien sodat ons kan ondersoek instel of ʼn misdaad gepleeg is.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

63 Kommentare

jongste oudste gewildste
Reg

Kan jy glo. So gaan geen haan weer daaroor kraai. Wat kos dit om n Helli n uur lank in die lug te hou.

Geskok

Red nou ‘n land met so ‘n nasie.

Lizette Coetzee

Ag tog ….swak taalgebruik! Dit was sekerlik’n vlieënier! ???

Mimi

Party mense sal net altyd iets vind om oor te kla. N mens weet nie hoe lank was die vlienier al besig om te werk nie….dalk vroeg toe ander nog snoesig geslaap het. Hy is ook maar n mens wat honger word. Genade, wees tog verdraagsaam.

GES

Skop eerder ʼn kabaal op oor polisievoertuie wat vir privaatdoeleindes gebruik word. Dit is ʼn heelwat groter probleem as ʼn polisiehelikopter wat ʼn landing maak op ʼn sigbare polisiëringsvlug.