Noordwes-LUR eis in een jaar R1 miljoen vir reis  

Desbo Mohono.

Die premier van Noordwes is versoek om op te tree nadat die provinsie se LUR vir landbou meer as R1 miljoen geëis het vir die gebruik van haar private voertuig vir werkdoeleindes.

Volgens Freddy Sonakile, DA-LP in Noordwes, het hy premier Job Mokgoro versoek om sy belofte gestand te kom en op te tree in verband met die bedrag wat deur Desbo Mohono geëis is in die 2019/’20-boekjaar.

“Mokgoro het verlede jaar toegegee dat so ʼn wesenlike eis en die gebruik van ʼn private voertuig deur ʼn LUR vir amptelike pligte strydig is met die riglyne in die ministeriële handboek en hy het onderneem om die aangeleentheid te ondersoek.”

Daar is egter nog geen stappe teen Mohono gedoen vir die eis van R1 009 233,62 nie.

ʼn Verslag deur die provinsiale departement van landbou en landelike ontwikkeling van 29 April 2020 sit die omstandighede uiteen rakende Mohono se gebruik van haar private voertuig.

Volgens dié verslag het die departement in die 2016/’17-boekjaar ʼn Jeep Cherokee gekoop vir die voormalige LUR. Ná die kabinetskommeling in Desember 2018 is die voertuig aan die LUR vir gesondheid toegeken en het Mohono nie ʼn ampsvoertuig gehad nie. Sy is egter ʼn ander motor aangebied, maar sy het dit van die hand gewys en besluit om eerder haar private voertuig te gebruik.

Daar was volgens die verslag ook ʼn tweede voertuig, ʼn Ford Ranger Wildtrack-bakkie wat minder as 10 000 km afgelê het, vir Mohono beskikbaar. Dié voertuig is spesifiek bekom vir rowwe terrein, maar Mohono wou ook nie die bakkie gebruik nie. Die ministeriële handboek van 2007 was toe nog in gebruik en hiervolgens mag LUR’e hul private voertuie vir werkdoeleindes gebruik het en daarvoor geëis het.

Toe die nuwe ministeriële handboek in gebruik gekom het, is die tersaaklike persone ingelig dat daar nie meer voorsiening gemaak word dat LUR’e hul private voertuie vir werksdoeleindes mag gebruik nie. Nietemin was daar geen optrede nie.

Volgens Sonakile sal die DA die Openbare Beskermer nou versoek om die LUR se “skaamtelose uitbuiting van haar posisie” te ondersoek om te verseker dat sy die gevolge dra van haar optrede.

“Die onverpoosde misbruik van openbare geld deur amptenare en die gebrek aan gevolgbestuur van die ANC-regering het lankal epiese proporsies bereik.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Blikke

Ag lekker man, lekker!!!

Thelsa

Hoe lekker ry die soustrein man !!!!

Manie

Bied haar ‘n lowbed trokkie aan.

Eiervrug

Nou moet net nie die eis uitbetaal nie…. En as dit reeds gedoen is, dank daardie persoon af wat die eis goedgekeur het, en verhaal dan die geld van U hoogheid. Dit gaan my verstand te bowe dat sulke probleme groot struikelblokke is vir die ANC……. DOEN NET JULLE WERK ORDENTLIK!

Martie

Gats… ek kan doen met ‘n ekstra R84,100 pm vir reisdoeleindes ….
Het sy elke dag tussen die Kaap en Mesina gery?