Nou dreig Shivambu met geweld oor grond

Floyd Shivambu, adjunkleier van die EFF. (Argieffoto)

Floyd Shivambu, adjunkleier van die EFF, dreig dat onwettige metodes gebruik sal word om grondonteiening sonder vergoeding af te dwing, ʼn verklaring wat die DA as nie net roekeloos nie, maar gevaarlik bestempel het.

Dr. Annelie Lotriet, ʼn DA-LP, sê Shivambu se opmerking grens aan aanhitsing om geweld te pleeg en Suid-Afrika se grondwetlike bestel te ondermyn.

Die DA sê in ʼn verklaring wat tydens die sitting van die ad hoc-komitee oor artikel 25 gemaak is, het Shivambu gesê “die ANC sal ons mense geen ander keuse laat as om aan buitegeregtelike prosesse van grondhervorming hier in Suid-Afrika deel te neem nie. Wat ook al in Suid-Afrika gebeur, sal soos ʼn piekniek lyk wanneer die mense nou grond vir hulself moet neem”.

Lotriet sê die DA gaan ʼn amptelike klagte by die parlement se etiekkomitee indien en vra dat die hoogste moontlike sanksie aan Shivambu opgelê word vir die uitsprake.

“Nie net is hy onkundig oor die eed wat hy as parlementslid afgelê het om die Grondwet te verdedig en te handhaaf nie, Shivambu en sy party bewys bo alle twyfel dat hul doel is om die fondamente van ons demokrasie af te brand deur geweld as ’n politieke wapen te gebruik,” sê Lotriet.

Die afgelope paar dae se geweld en plundering in KwaZulu-Natal het reeds tientalle lewens geëis en skade van miljarde rande aangerig.

Lotriet sê die bedekte dreigement dat dit ʼn piekniek was in vergelyking met wat sal gebeur met grondonteiening, moet verwerp word met die minagting wat dit verdien.

“Die EFF is ʼn  gevaar vir ons demokrasie en sy bereidwilligheid om geweld goed te keur moet deur alle vredeliewende Suid-Afrikaners verwerp word.”

Sy sê mense het vandeesweek met afgryse gesien hoe die ANC se faksiegevegte in KwaZulu-Natal anargie aangevuur het wat gelei tot die plundering en vernietiging van eiendom.

“Dit kan nooit die toekoms van Suid-Afrika wees nie en die DA verwerp die EFF se indoktrinasie van geweld in sy geheel.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

70 Kommentare

jongste oudste gewildste
Persheks Adri

EFF’ers het al hoe méér klagtes teen hulle, maar flippen niemand gaan sit nie! Tyd dat iemand die klomp in die bek ruk pffft!!!

Michael

Hulle dreig al vir jare met geweld en steeds sit hulle in die parlement. Wat gaan nou anders gebeur? Niks!

Diline

Wil ook als verniet he – gaan werk ‘n slag soos ander landsburgers en koop jou eie stuk grond – julle maak mens naar!

Toy

Dit moet nou gladnie geduld word nie, die land het nie so iets ook nodig.

M-woord

Jy kan sommer jou effertjies Brackenfell toe bring! Dan kan ons klaarmaak waarmee julle begin het jou sleg…..