NSFAS het SA ‘in die steek gelaat’, sê Scopa

Argieffoto ter illustrasie. (Foto: NSFAS, Facebook)

Scopa (die staande komitee oor openbare rekeninge in die parlement) het Woensdag gesê die Nasionale Skema vir Finansiële Bystand vir Studente (NSFAS) het Suid-Afrika in die steek gelaat.

“NSFAS is geteister deur korrupsie veral deur werknemers wat op ʼn bedrieglike wyse leengeld geneem het en die regering het boonop ineengestort,” het Mkhuleko Hlengwa, voorsitter van die komitee, in ʼn verklaring gesê.

Die komitee het ook ʼn verslag van South African Express (SA Express) verwerp en sy kommer oor die mynmaatskappy Alexkor uitgespreek.

Dié drie entiteite het vandeesweek met Scopa vergader om te verduidelik hoekom hulle nie hul jaarverslae vir 2018-’19 ingedien het nie. Hoewel NSFAS ʼn datum gegee het wanneer hy beplan om sy verslag in te dien, het SA Express en Alexkor nog nie aangedui wanneer hulle hul verslae gaan indien nie.

“Die komitee is van mening dat die vorige NSFAS-direksie Suid-Afrikaners in die steek gelaat het deur toe te laat dat die entiteit só ʼn punt bereik. Die entiteit is tans onder administrasie en kon nie sy jaarverslag betyds voorlê nie,” het Hlengwa verduidelik.

Volgens Hlengwa het Scopa die verslag van SA Express verwerp waarin dit ʼn onbevredigende uiteensetting gegee het oor hoekom die onderneming nie finansiële jaarstate ingedien het nie.

Volgens Scopa het hy verneem dat SA Express ʼn brief van die regering ontvang het waarin die onderneming van ʼn fondstoekenning van R300 miljoen ingelig word. Die komitee het gesê hy kan dus nie ʼn vertraging in die regering se finansiële reddingsaksie aanvaar as ʼn verskoning dat SA Express nie sy jaarverslag kon voorlê nie.

Hlengwa het gesê die komitee sal vergaderings byeenroep om die aard van sodanige fondstoekennings by staatsbeheerde ondernemings te begryp veral met betrekking tot die hantering van die oorsaak van finansiële probleme.

Die komitee het kommer uitgespreek oor die haglike situasie by Alexkor wat tans ook onder administrasie is.

“Alexkor het hoë skuldvlakke en geen kans om daardie skuldeise na te kom nie,” het Scopa gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Outoppie

En oom Tito wil hê ek moet tol betaal

waarheid

Is nie verbaas nie – is julle?
S A regering het die hele S A in die steek gelaat – nie net hierdie lot nie!

Joubert

Watter nasionale skema het Suid Afrika nog NIE in die steek gelaat nie?

Ok miskien die Gautrein. Ek hou nogal van die Gautrein. Ek betaal sommer vir nog twee jaar belasting!

Feite

Suid Afrika sal nooit weer op die pad van herstel kom nie, omrede Suid Afrikaanse ANC kaders orals aangestel word met een doel voor oe en dit is om met die verswelging in getalle en korrupsie hulself so te verryk dat vervolging so n byna onmoontlike taak geword het, dat vervolging ook deel geword het van selfverryking deur korrupsie. Die uiteinde is dat korrupsie gelde nie verhaal kan word nie en daar bloot geen ander uitweg is as om die gelde af te skryf nie! Die realiteit van die korrupsie en misdaad situasie in SA is, dat wanneer die inkomste… Lees meer »

Johan

Kan die Regering nou wraggies nie eers één ding sonder korrupsie aanpak nie?