Nuutste SA partyleier spoel mond uit: Die wêreld volgens Hlaudi

Hlaudi Motsoeneng. Foto: Catherine Rice/ANA

Nugter weet hoeveel steun die oudbaas van die SAUK, Hlaudi Motsoeneng, se nuutgestigte politieke party gaan kry, maar dat die voormalige uitsaaier ‘n bekkige politikus gaan wees, is gewis.

Reeds by die stigting van sy party, die African Content Movement (ACM), in die Johannesburgse woonbuurt Milpark vlak neffens die SAUK waar hy eens koning was, het Motsoeneng getoon hy het die vermoë behou tot die bisarre uitlatings wat hom as uitsaai-ringkop so berug gemaak het, insluitend sy neiging om deurgaans na homself in die derde persoon te verwys, asof hy van iemand anders praat.

“Hlaudi het aangekom. Ek is hier saam met my span,” het hy aan ‘n taamlik groot groep ondersteuners by ‘n plaaslike hotel gesê voordat hy sy eerste verkiesingsbelofte gemaak het: As hy president word, sal hy met ‘n fiets ry, want al hierdie ampsmotors en lyfwagte is sommer bog.

Motsoeneng het dadelik oorlog verklaar teen pres. Cyril Ramaphosa, en is van voorneme om die president se plek in die neem in Tuynhuys en die Uniegebou. “Waarin ek belang stel is die presidensie. Ek is hier om pres. Ramaphosa opdraande te gee,” aldus Motsoeneng.

Presies wat sy party se beleidsbesluite is, sal hy in Januarie aankondig wanneer die ACM amptelik bekend gestel sal word. Onderwys en grondkwessies is van die sake wat dan aandag sal kry, het die nuutgemunte politikus belowe.

En hy is nie skaam om die ANC te takel nie: “Die ANC is net ‘n logo en ‘n naam. Wat doen daardie logo vir jou? Die ANC is nie in staat om Suid-Afrika te verander nie. Vandag gebruik hulle vir Msholozi (oudpres. Jacob Zuma), môre vir Ramaphosa. Ek is gereed vir Msholozi en Ramaphosa. Ek gaan hulle opdraande gee!” het Motsoeneng beweer.

“Hierdie party (die ACM) gaan Suid-Afrika regeer. Swart, wit, bruin en Indiër gaan vir ons stem, want hulle weet hoe goed ek is met implimentering,” was die aanspraak van die nuwe partyleier, wat deur kritici daarvan beskuldig word dat hy die SAUK in die grond in bestuur het.

Motsoeneng, wat in die verlede daaraan skuldig bevind is dat hy gelieg het oor sy kwalifikasies, meen sy party kan nou almal verteenwoordig wat nie oor kwalifikasies beskik nie maar steeds in hulself glo.

Hy laat ook nie toe dat sy eertydse edik by die SAUK dat 90% plaaslike musiek uitgesaai moet word, teen hom tel nie: “Hierdie Engelspratery in die parlement is onsin. Die ACM sal ander tale praat. Ons is die 90%-van-alles Suid-Afrikaanse party,” het hy gesê.

Die ACM is reeds by die Verkiesingskommissie as party geregistreer en sal beslis op aanstaande jaar se stembrief vir die nasionale verkiesing verskyn.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

52 Kommentare

jongste oudste gewildste
Johan

Hoekom is daar so baie politieke partye? Want hulle maak almal net geld uit jou en my uit. DA ingesluit.

Flokkit

Ou ‘ramkat’ . Ek stem vir jou volgende jaar. Ek belowe(nie). Bwha hahaa

Jackie O

Nou wonder ek, hoekom eers wag tot jy president is voor jy fiets ry…??

Johan

Laat ek dink… Nee wat, Meneer! As jy die land moet regeer soos by die SAUK, gaan ons almal goedkoop Chinese fietse moet gebruik..

Gert

Dit is omdat hierdie bedriërs en diewe wegkom met moord dat hulle maak en sê wat hulle wil, niemand in die regering ruk hulle in die bek nie. Dit is nou wat ek noem dieselfde mentaliteit as n swanger muishond!!