Nuwe aansoek: Zuma ‘probeer tyd wen’

Die Konstitusionele Hof het ingestem om oudpres. Jacob Zuma se dringende aansoek vir die tersydestelling van sy skuldigbevinding en vonnis aan te hoor. (Argieffoto: Kim Ludbrook/AFP)

Die Konstitusionele Hof het ingestem om oudpres. Jacob Zuma se dringende aansoek vir die tersydestelling van sy skuldigbevinding en vonnis op Maandag 12 Julie aan te hoor.

Dít beteken dat die bevel dat Zuma hom teen Sondag by die Nkandla- of Johannesburg-Sentraal-polisie moet aanmeld om sy vonnis te begin uitdien, vir eers agterweë bly.

Maroela Media het vroeër berig dat die land se hoogste hof die voormalige staatshoof Dinsdag tot 15 maande tronkstraf gevonnis het vir minagting van ’n hofbevel om voor die Zondo-kommissie na staatskaping te getuig.

Ulrich Roux, strafregkenner en prokureur, het Saterdag aan Maroela Media gesê dat hy die Konstitusionele Hof se instemming om Zuma se tersydestellingsaansoek aan te hoor as ’n “baie ongewone stap” beskou.

“Zuma het die Konstitusionele Hof gevra om die aansoek te heroorweeg in die lig daarvan dat hy nie ’n geleentheid gegun is om getuienis ter versagting van sy vonnis te lewer nie.

“Die feit bly dat hy verskeie geleenthede gekry het om sy getuienis voor die hof te plaas. Hy het gekies om dit nie te doen nie.

“Die gevolg hiervan is nou dat die 11 regters wat die minagtingsaansoek aangehoor het en wat drie maande gevat het om ’n baie gedetailleerde en komplekse uitspraak te lewer, nou moet teruggaan en Zuma se aansoek oorweeg.

“Dis baie ongewoon om dit sag te stel. ’n Mens kan net dink dat hulle waarskynlik baie sterk daaroor voel om albei kante van die saak aan te hoor.”

Prof. André Duvenhage, ’n politieke ontleder verbonde aan die Noordwes-Universiteit in Potchefstroom, sê dit is ongetwyfeld ’n poging om tyd te wen.

“Ongeag hierdie tussenspel, waar Zuma nou weer getuienis voor die Konstitusionele Hof gaan lewer, sal hy eintlik maar slegs ten beste enkele maande in die tronk uitdien. Dít bly my mening.

“Ek vermoed as hy omtrent vier maande sou uitdien, sal hy op grond van goeie gedrag vrygelaat word. Indien hy mediese sertifikate as bewys kan lewer, sal hy waarskynlik onder huisarres by Nkandla geplaas word.

“Ek verwag nie dat dit die Konstitusionele Hof se besluit op enige manier weens die aansoek sal verander nie, maar ek dink dit verleen gewoon groter legitimiteit aan die regsproses.”

Duvenhage sê hy is egter bekommerd oor konsekwentheid en sistematiek, asook oor die kwessie of die Konstitusionele Hof aan gewone landsburgers dieselfde geleentheid sou bied.

“Wat wel duidelik is, is dat Zuma oor magsbasisse beskik wat ’n bedreiging vir Suid-Afrika se Grondwet en veral die toepassing daarvan inhou.

“Hierdie aangeleentheid is ’n baie groot toets vir grondwetlike regering, die oppergesag van die reg en die Grondwet in Suid-Afrika.”

Dr. Llewelyn Curlewis, strafregkenner, sê dit is “absoluut absurd” en dat die aansoek met ’n spesiale putatiewe kostebevel van die hand gewys behoort te word.

“Dit maak ’n bespotting van die reg.”

Die Jacob G Zuma-stigting het intussen op Twitter aangekondig dat Zuma die land Sondag om 18:00 vanuit die Nkandla-ouditorium sal toespreek, en nie in Durban soos voorheen aangekondig is nie.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

65 Kommentare

jongste oudste gewildste
annie

Sal Zuma hom selfs met covid laat ‘besmet’ om sy sin te kry en dan ‘aan te sterk’ onder paleisarres? Hoe tragies. Sedert die Shaik-dae en Zuma se kwytskelding stu hy en sy bevrydingsleèr voort om ‘by hook or by crook’ in die ANC se voorste terroriste-linie te bly. Sy swart boekie is vol van name van wie hy alles weet en sorgvuldig opgeteken het, vir latere gebruik. Die tyd is nou.

Sambok

Ons regstelsel bestaan nie meer nie en die land gaan in vervalle-die rooipette wat ten gunste was om Zuma toe te sluit se bekke is nou stil,hoekom gaan help hulle nie die polisie nie?

JM

Ons land se regstelsel het ‘n grap geword. Êrens is ‘n groot skroef los, want hoekom word Zuma met handskoene hanteer?

Strandloper

Wat n klug spel! Wel rampoker moes iets doen voor beide deur die trallies loer!

Tiptol

Glad nie verras nie.