Nuwe hoof- uitvoerende beampte vir VL

Gernie Botha (Foto: Verskaf)

Vrystaat Landbou (VL) het Donderdag bekend gemaak dat hy Gernie Botha as sy hoof‑ uitvoerende beampte aangestel het.

Botha, wat al jare lank in diens van VL is, beklee reeds dié posisie vanaf 1 Mei.

Francois Wilken, president van VL, sê die bestuur is baie gemaklik en opgewonde oor Botha se aanstelling.

“Gernie is ’n man van integriteit, iemand op wie jy werklik kan staatmaak en sy liefde en toegewydheid vir die landbougemeenskap van die Vrystaat is opmerklik in sy handel.”

Botha is in 2014 as regsadviseur van VL se veiligheidsafdeling aangestel voordat hy later tot bedryfsbestuurder bevorder is.

Hy neem nou die leisels as hoof‑ uitvoerende beampte oor nadat VL se dagbestuur die afgelope paar jaar die uitvoerende beampte se funksies vervul het.

VL sê in ’n verklaring Botha is ten spyte van al die uitdagings waarvoor die landbousektor te staan kom, steeds optimisties oor die geleenthede wat dié sektor bied.

“Om in Suid-Afrika te boer vereis senuwees van staal, maar die geskiedenis het gewys dat boere en die landbousektor ten spyte van baie uitdagings altyd bereid is om te sorg dat daar kos op die tafel is. Deursettingsvermoë is ʼn eienskap wat onteenseglik deel van ʼn boer is endaarom is die wyse woorde van CJ Langenhoven so gepas: ‘Laat ons nie so besig wees om kanse te soek dat ons die geleenthede een vir een laat verbyglip nie’. ”