Nuwe kanale vir SAUK beplan

Argieffoto

Argieffoto

Die SAUK het Saterdag die bekendstelling van nuwe televisiekanale gegrond op landstale om al die taalgroepe in die land te bedien, aangekondig.

Hlaudi Motsoeneng, die uitvoerende hoof van die uitsaaier, het in ʼn verklaring gesê die SAUK het besluit om hierdie kanale aan die miljoene SABC-kykers beskikbaar te stel sodat hulle televisieprogramme in die taal van hul keuse kan geniet.

“Sover beplan ons om die kanale te groepeer volgens taalaanpasbaarheid, soos Sesotho, Setswana en Sepedi saam in die Sotho-kanaal, isiZulu, isiXhosa, Siswati en isiNdebele as deel van die Nguni-kanaal, terwyl die derde kanaal inhoud sal lewer vir xiTsonga en tshiVenda en die vierde kanaal op Afrikaanssprekendes gerig sal wees,” het Motsoeneng gesê. “Die nuwe kanale sal ʼn mengelmoes vir al die kulture en tradisies van daardie taalgroepe wees.”

Dit is nie duidelik wanneer hierdie kanale bekendgestel sal word nie.

Hy het bygevoeg die plaaslike inhoud van die huidige SABC-kanale sal ook vermeerder word om meer te fokus op voorheen gemarginaliseerde tale, soos xiTsonga, tshiVenda en Afrikaans. Die SABC-nuusbulletins sal voortaan ook ʼn gedeelte bevat wat spesifiek op provinsiale nuus fokus om nuus oor “die hele Suid-Afrika volledig te dek”.

Volgens Motsoeneng vorm hierdie besluite deel van die uitsaaier se digitale migrasie-strategie. “Die SAUK sal vakante poste en tenders slegs op SAUK televisie, radio en digitale platforms adverteer en nie meer enige advertensies in gedrukte- of ander mediaplatforms gebruik nie. Hierdie besluit geld onmiddellik,” het Motsoeneng gesê.

“Die SAUK het ook besluit die dienste van eksterne bemarkingsagentskappe sal nie meer gebruik word nie, aangesien die maatskappy genoeg interne kreatiewe kapasiteit het om bemarkingsveldtogte te hanteer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

14 Kommentare

jongste oudste gewildste
Henk

Jare gelede het die SAUK gesê daar kom nuwe televisiekanale in die vorm van SABC4 en SABC5. Daardie plan is nooit uitgevoer nie. Dus ons sal maar moet wag watter deel van hierdie berig werklikheid word…

Koos

Is dit nie dieselfde persoon wat on omstredenheid gedompel is oor sy aanstelling nie?

DPJ

Soos ek verstaan sal daar net 4 kanale wees en niks meer nie.
Meeste kykkers betaal ook nie vir die diens nie so, óf die programme moet baie herhaal word óf lisensie gelde sal baie verhoog moet wrod. Die keuse is jou besluit!

Francois

Nou kan die ANC elkeen in sy eie taal indoktrineer. Nee wat, die SAUK (‘skuus, die EsYBieSie) is so irrelevant soos Zuma by ‘n anti-korrupsie konferensie.

Johannes van Rooyen

Soos alles in die ANC beplan word maar niks gebeur nie ek het jare laas enige iets op sabc gekyk hulle sal my nie weer oortuig om iets te kyk nie