Nuwe kurrikulum vir seksvoorligting ‘sagte pornografie’

Die beplande inhoud vir seksvoorligting in skole. (Foto: Skermgreep)

Die departement van basiese onderwys se nuwe omvattende seksuele onderrig-kurrikulum behels glo dat leerders hul geslagsdele in die klas identifiseer, kommentaar lewer op kaal foto’s wat gebruik is in seksklets-boodskappe (sextexting) en leer wat behels vaginale, orale en anale seks. Dié kurrikulum vorm deel van die vak Lewensoriëntering en sal na verwagting in 2020 van gr. 4 tot gr. 12 geïmplementeer word. Minister Angie Motshekga, minister van basiese onderwys, het glo ook reeds baie van dié inhoud goedgekeur.

Die inhoud is onlangs aan lede van die parlement beskikbaar gestel en op die groep Freedom of Religion South Afrika (FOR) gepubliseer. Hiervolgens sal gr. 4-leerders tydens groepbesprekings hul eie en hul klasmaats se “skaamdele” moet identifiseer.  Gr. 5’s sal leer van homoseksuele molestering en seksuele aanranding en graad 6’e sal gevra word wat hulle dink van foto’s van kaal persone wat in Whatsapp-boodskappe gestuur word.  Gr. 8-leerders se onderwysers sal hulle inlig oor wat gebeur tydens orale, vaginale en anale seks. Volgens FOR wil dit voorkom of die inhoud selfdegeslagverhoudinge en aborsie normaliseer. Handboeke bevat ook grafiese foto’s van die aanwend van vroulike kondome.

FOR het in ʼn persverklaring hul misnoeë oor die inhoud van die kurrikulum uitgespreek.

“Nadat ons die inhoud van die kurrikulum onder oë gehad het, weet ons dat ouers en onderwysers rede het om bekommerd te wees,” sê Michael Swain, uitvoerende hoof van FOR. “Baie van die inhoud waaraan kinders blootgestel gaan word, is gelykstaande aan sagte pornografie.” Hy sê ouers het die reg om toegang tot hierdie inhoud te hê en indien dit nie ooreenstem met die waardes wat hulle graag aan hul kinders wil oordra nie, moet ouers die reg hê om hul kinders uit die klas te verwyder.

Die departement het in Mei vanjaar hewig wal gegooi nadat Sunday Times berig het dat leerders voorts oor masturbasie gaan leer. Toe het Elijah Mhlanga, departementele woordvoerder, gesê dat gr. 4-leerders op die mees gepaste en sensitiewe wyse onder meer sal leer waar babas vandaan kom.

Die Skoleondersteuningsentrum (SOS) is van mening dat die voorgestelde seksonderrig leerders nie toerus nie, maar blootstel aan ʼn uiters grafiese kurrikulum wat oor die algemeen nie ouderdomsgepas is nie.

“Ons glo dat die grafiese aard van die kurrikulum leerders onnodig blootstel aan kennis waarvoor hulle nie gereed is nie in ʼn omgewing wat nie toegerus is vir die hantering van die sensitiewe aard van die onderwerp nie,” sê Melanie Buys, hoof van ontwikkeling aan die SOS.

Buys benadruk dat die grondliggende doel van lewensoriëntering die vaslegging van waardes moet wees. “Weens tegnologie het leerders deesdae toegang tot baie materiaal waarvoor hulle dikwels nie gereed is nie. Dit kan slegs teëgewerk word deur ʼn gesonde waardestelsel en kritiese denke. Die voorgestelde kurrikulum blyk nie ouderdomsgeskik te wees nie en bevat grafiese inligting strydig met gesonde gesinswaardes. Alhoewel mens leerders wil toerus om as tieners veilig te wees en die regte besluite te neem, sal hierdie kurrikulum leerders eerder aanmoedig tot onvanpaste en onveilige gedrag,” sê Buys.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

192 Kommentare

jongste oudste gewildste
Lana

Nou gaan jy n gemors sien, dankie tog my kind is klaar met skool

Bernedette

Pleks bring hulle selfverdeging in as vak sodat die kinders van kleintyd af geleer word en situasies kan hanteer. Nou word hulle heeltemal bloodgetstel en nuuskurig. Ek dink dis belaglik!

Marissa

Sjoe okay… Mense kom ons wees nou dood eerlik met mekaar: hierdie kurrikulum bevat absoluut NIKS waaraan kinders nie alreeds aan blootgestel word d.m.v. byvoorbeeld die internet of selfs maats nie. Ek verkies dan eerder dat my kind voorligting in ‘n begeleide omgewing kry as wat hy/sy dit by vriende of op ‘n selfoon gaan opsoek. Ek glo ook nie kinders wil enigsins seksvoorligting by HUL OUERS kry nie… Dis nog meer ongemaklik as in klasverband…

Maar bygesê, kinders is kinders en hul sal altyd maniere vind om sulke inligting te bekom. Dit was toentertyd dieselfde gewees.

Alta

Siek siek siek siek siek…… Dis siek! Dit gaan beslis ‘n groot gemors afgee.

Molly

Daar is nie ‘n manier nie, het nou die skool ge-email en weier volstrek dat my 10 jarige sulke goed leer bogger dit!