Nuwe landelike veiligheidsplan vandeesweek bekend

(Argieffoto: Heritage Protection Group)

Die minister van polisie, Bheki Cele, en die nasionale polisiehoof, genl. Khehla Sitole, stel Vrydag die hersiene nasionale landelike veiligheidstrategie in Makhado (Louis Trichardt) in Limpopo bekend.

Die plan is onder meer daarop gemik om ʼn plaasveiligheidsplan daar te stel wat ʼn vinnige en gesamentlike reaksie op voorvalle moet verseker en ʼn veilige landelike omgewing moet help skep.

Die organisasie TLU SA sê hy steun dié plan en het op nasionale vlak met die polisie saamgewerk om die strategie te ontwikkel. “TLU SA is reeds sedert die laat negentigs in landelike gebiede bedrywig met plaaswagstrukture. Samewerking met bestaande gemeenskapspolisiëringstrukture asook die private veiligheidsbedryf bevestig dat konstruktiewe deelname die enigste oplossing is,” het Drickus Botha, TLU SA-Noord se streeksbestuurder, Woensdag gesê.

“Gevolglik word wetsgehoorsame burgers en belangstellendes aangemoedig om by plaaswag- of gemeenskapsveiligheidstrukture betrokke te raak.”

Die organisasie sê die strukture wat hy die afgelope jare gevestig het, is ook in ooreenstemming met die polisie se struktuur en strategie gedoen.

“Ons doen ’n beroep op politieke partye om die bestaande strategie en deelnemende organisasies en strukture te steun. Die betrokkenheid van onafhanklike mense, soms met eerbare bedoelings, verwar andersins net bevel en beheer tussen deelnemers,” het Botha gesê.

“TLU SA versoek verder enige ander organisasies wat op die terrein van landelike veiligheid beweeg, om saam te werk. Die oor-en weer-gestryery doen landelike veiligheid niks goed nie. Dit is ook belangrik dat organisasies hulle moet bepaal by hulle kernbesigheid en die polisie nie voortdurend kritiseer oor hulle werksaamhede nie.

“Ons sien daarna uit dat begrippe soos ‘gemeenskap in blou’, ‘landbouvriendelike reservistestelsel’ en ‘landbouveiligheid’ in die breë sin van die woord, al hoe meer gebruik sal word,” het Botha gesê.

TLU SA sê hy is verbind tot die landelike veiligheidstrategie en is oortuig dat dit landelike veiligheid gaan bevorder as alle rolspelers saamwerk om boere en plaasbewoners volhoubaar en veilig op plase te hou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Andre Naude/Louis Trichardt

Dit is amptelik Louis Trichardt en nie Makhado nie.Dit het 15 jaar geneem om die hofsake teen die naamsverandering te wen.

de Wet

Stem saam met Andre

pieter

Klink goed maar mense moet julle nie blind staar nie dit is dingaan se ou planne, verder weet die ingeligdes wat gebeur het.

Regs!

Ons polisie se reaksie is van die beste ter wêreld! 99,9% van die tyd is hulle alreeds op die toneel terwyl die misdaad nog gepleeg word!

Al

Ek wonder, kry die sekuriteits en landelike beveiligingsorganisasies darem belastingkorting vir hul maatskapye, aangesien hul in ondersteunende hoedanigheid die polisie help?