Nuwe Omikron-variant in Botswana gevind

Argieffoto bloot ter illustrasie. (Foto: Unsplash)

ʼn Nuwe Covid-19-variant is vandeesweek in Botswana opgemerk en is skynbaar ʼn subvariant van Omikron.

Die nuwe variant is reeds in vier mense in die land geïdentifiseer, maar volgens owerhede is dit ook reeds in drie ander lande opgemerk.

Christopher Nyanga, woordvoerder van die minister van gesondheid en welstand in Botswana, het Maandag hierdie bevindinge bevestig.

“ʼn Breedvoerige analise van die variant het bevestig dat dit van die Omikron-variant afkomstig is,” sê hy. “Die voorlopige bevindinge is as Omikron BA.4 en BA.5 benoem.”

Die vier gevalle word tans deur owerhede gemonitor sodat meer inligting oor die moontlike impak en verspreiding van die variant ingewin kan word.

Die vier mense is almal tussen 30 en 50 jaar oud, maar twee van hulle is nie burgers van Botswana nie en het glo onlangs internasionaal gereis. Al vier die mense is ingeënt en ervaar slegs matige simptome.

“Die ministerie, in samewerking met ander streek- en internasionale belanghebbendes, bestudeer die eienskappe en kenmerke van die Omikron-subvariant om meer data en kennis oor die omvang daarvan te bekom,” sê Nyanga.

“Tot dusver is nog geen gevolgtrekkings gemaak of die subvariant meer dodelik of meer oordraagbaar is as die bekende Omikron-variant nie.

“Ondersoeke na die doeltreffendheid van die Covid-19-inentings teen die nuwe variant is steeds aan die gang.”

Volgens die ministerie wag hy nou op verdere leiding van die Wêreldgesondheidsorganisasie (WGO) oor hoe om die verspreiding hok te slaan.

“Hoewel dit algemeen is dat virusse muteer soos hulle van een persoon na ʼn ander versprei, is slegs sommige mutasies verantwoordelik vir ʼn hoë infeksiekoers en ernstige siektes. Dit sal onder andere wees as gevolg van veranderinge in die virus se gedrag en eienskappe,” sê die ministerie.

“Eers wanneer dit gebeur, kan dié nuwe variant as ʼn bedreiging geklassifiseer word.

“Nuwe veranderinge wat in ʼn variant opgemerk is, is egter altyd onderhewig aan verdere ondersoeke en verifikasie deur die internasionale wetenskaplike gemeenskap.”

Owerhede het intussen ʼn beroep op lede van die publiek gedoen om kalm, maar waaksaam te bly.

“Die ministerie sal die publiek op hoogte hou van enige nuwe verwikkelinge in hierdie geval.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

37 Kommentare

jongste oudste gewildste
Emile

Niemand gee meer om oor nuwe variante nie, daar gaan altyd nuwe variante wees, kyk na jouself en jou liggaam.Net soos griep gaan hierdie altyd deel van ons samelewing wees

Anel

En daar begin dit! Saai paniek want die 15 de kom mos nou weer nader!!!

Bernard

Verstommend hoe hierdie narratief lewend gehou moet word.

Misky

Aagghhhh, hier gaan ons alweer….. Ons regering sien net ‘dollar signs’ as hulle sulke nuus kry.

Miskruier

Waarom is die mense getoets as hul matige simptome het? Waarom het die vaksien nie die verspreiding gestop nie??