Nuwe tegnologie help spina bifida-lyertjie loop

Wian en Chrissie Adriaanse saam hul seuntjie, Elian
(Foto: verskaf)

Toe dokters drie jaar gelede aan die Adriaanse-egpaar gesê het hul ongebore baba het ʼn erge vorm van spina bifida, het hulle hul op die ergste voorberei. Dié krullebol is egter die ene energie en toon sedert die begin van die jaar merkbare vordering, nadat hy verlede jaar met nuwe terapie begin het.

Sy ouers hoop nou dat hy wel eendag op sy eie sal kan loop.

“Daardie eerste paar dae na die diagnose was vir ons baie erg, maar ons het geweet die Here is in beheer van die situasie. Ons moet Hom met die res van die swangerskap en spesifiek met Elian vertrou.”

Só vertel Chrissie Adriaanse oor die dag toe hulle uitgevind het hul seuntjie het ’n erge vorm van spina bifida (Myelomeningocele). Die 30-jarige Chrissie was toe 18 weke swanger met haar en haar man, Wian, se eersteling.

Elian is gebore op 10 April 2021, met ’n erge vorm van spina bifida (Foto: verskaf)

“Die Here het van daardie dag af vir ons geseën met mense wat saam gebid, geveg en vertrou het. Ons kon nog elke dag ervaar hoe daardie gebede ons gedra het en vir ons en Elian by die voete van die Here neergelê het.”

Volgens Adriaanse was dit moeilik vir die dokters om ʼn voorspelling te maak oor die ware effek wat die defek op die baba sou hê. Die dokters het klem gelê op die ergste scenario, wat die moontlikheid ingesluit het dat Elian dalk nie sou asemhaal by geboorte nie.

Dié besige mannetjie het al nege operasies ondergaan. Hy het vog op die brein en daarom ʼn dreineringstelsel in sy kop om die vog te help dreineer. Hy is verlam tot onder sy heupe.

Elian se mees onlangse operasie was in Desember 2023 toe die meganisme (dreineringstelsel) in sy kop vervang moes word.

Vroeg in Januarie vanjaar, ná ʼn MRI-skandering, het die Adriaanse-egpaar egter die wonderlike nuus ontvang dat Elian se toestand tans stabiel is. Daar is ook geen meer prosedures wat vanjaar op Elian wag nie, danksy ʼn nuwe vorm van terapie wat die gesin op die proef gestel het.

Die eintlike wonderwerk

Elian het vroeg verlede jaar begin met spinale stimulasieterapie. Sedertdien kan sy ouers duidelik sien hoe dit sy lyfie bevoordeel.

Chrissie het op ʼn Amerikaanse spina bifida- Facebook-groep die eerste keer van dié terapie gehoor, wat deur die fisioterapeut, Gerti Motavalli, gedoen word. Motavalli spesialiseer al meer as 35 jaar in pediatriese fisioterapie en fokus op die behandeling van ruggrate.

Hoewel hierdie terapie nog nie bekend is in Suid-Afrika nie, het die resensies oor hierdie terapie die egpaar oortuig om dit te probeer.

Elian maak ʼn paar keer ʼn dag gebruik van ʼn stimulatortoestel wat elektriese pulse deur middel van plakkers op sy lyf stuur. Die plakkers word oor die rugmurg geplaas en verander die pynseine na sy brein, wat veroorsaak dat hy geen pyn ervaar nie of dat dit bloot soos ʼn tintelende sensasie ervaar. Die egpaar moes die toestel ten duurste van oorsee af laat invoer, omdat dié tipe behandeling nog nie in Suid-Afrika beskikbaar is nie, maar sê dit was beslis die moeite werd.

“Voorheen het hy gesukkel om sonder die ondersteuning van sy hande te sit en om sy balans te behou. Hy het ook gesukkel om homself op sy knieë op te druk en daardie vierpunt-knielposisie te behou,” vertel Chrissie.

Byna ʼn jaar nadat hy met die terapie begin het, het hy gebruik begin maak van ʼn loopraam en ʼn enkel-voetstut wat hom help om regop te staan en die een been voor die ander een te sit.

“Ons kan sien hoe die terapie Elian se lyfie seën met onder andere ʼn toename in gevoel, bloedvloei en sterker bewegings in sy heupies. Ek en Wian sê keer op keer vir mekaar, ons probeer net en kyk of dit werk. As dit nie werk nie weet ons ons het ten minste probeer. Ons sê ook gereeld dat ons nie anders kan as om vir die Here te loof wanneer ons na Elian kyk nie”.

Tans fassineer dit die krulkopseuntjie om te sien hoe ander rondom hom normaal loop. “Hy hou sy maatjies wat hardloop en spring fyn dop. Maar wanneer hy in sy loopraam is en self een beentjie voor die ander sit, is hy baie trots daarop en vra dan vir my ‘mamma, wie loop?’ Sodat ek moet antwoord, ‘Dis jy wat loop, Elian’.”

Elian is gek oor die buitelewe (Foto: verskaf)

Volgens Chrissie weerspieël Elian se getuienis vir haar dat swaarky nie verniet is nie. “Hierdie pad het my voete kom losmaak hier op aarde en my met ʼn nuwe soort opgewondenheid laat uitsien na die ewigheid saam met ons Here. Daar waar geen swaarky is nie en waar Elian gaan hardloop.”

  • Meer oor Spina bifida

Spina bifida beteken gesplete ruggraat. Dit is wanneer die baba se ruggraat en rugmurg nie behoorlik in die baarmoeder ontwikkel nie, en ʼn gaping in die ruggraat gelaat word. Dié opening in die ruggraat kan aanleiding gee tot oortollige vloeistof wat tot gevolg het dat die breinweefsel nie ontwikkel nie.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

2 Kommentare

Ronél ·

Awww, liefste kind……………..voorspoed en seën op sy lewe.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.