NW-boere fnuik ‘rowers’ en polisiebeampte

Argieffoto

Ses verdagtes, waaronder ʼn polisiebeampte, is tydens ʼn gesamentlike poging deur boere van die Wolmaransstad-omgewing en die polisie vir sameswering om ʼn misdaad te pleeg aangekeer.

Lt.kol. Pelonomi Makau, provinsiale polisiewoordvoerder van Noordwes, het Donderdag gesê die verdagtes, almal mans tussen 24 en 52 jaar oud, is Dinsdag op ʼn plaas in die omgewing aangekeer.

“Die polisie is ontbied nadat ʼn verdagte Volkswagen Polo met ses insittendes deur boere opgemerk is. Vyf insittendes het weggehardloop toe die voertuig voorgekeer is,” het Makau gesê.

“Die boere het reeds ‘n 24-jarige verdagte aangekeer toe die polisie by die toneel opgedaag het. Twee van die verdagtes wat weggehardloop het, het hulself op die toneel aan die polisie oorgegee.” Die ander drie verdagtes is langs die N12-pad in hegtenis geneem waar hulle geryloop het.

Die polisie het die verdagtes se voertuig deursoek en op ʼn bloulig van die polisie, boeie, forensiese sakkies en twee onwettige vuurwapens afgekom.

“Verdere ondersoek het vasgestel dat die 52-jarige verdagte ʼn polisiebeampte is wat in Gauteng werksaam is. Hy was na bewering ook in besit van ʼn polisie-aanstellingsertifikaat.”

Die polisie het tydens inhegtenisnemings beslag gelê op altesaam drie vuurwapens.

Die verdagtes sal na verwagting Donderdag in die Wolmaransstad-landdroshof verskyn op aanklagtes van sameswering om ʼn huisroof te pleeg en die besit van onwettige vuurwapens en ammunisie.

Lt.genl. Baile Motswenyane, polisiekommissaris van Noordwes, het die boere en polisie geloof vir hul goeie samewerking en vinnige reaksie wat tot die verdagtes se inhegtenisnemings gelei het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
Vic

A – die boere ontwaak……

Willie van Zijl

Uiteindelik word besef dat daar SAPD beamtes help om te roof en misdaad te pleg en sodoende die “goeie” SAPD lede moedeloos maak en ‘n swak naam gee.

Johanna Botha

Ek wonder net of hulle nie ook gaan ontsnap uit polisieaanhouding soos al so BAIE keer gebeur het nie …sal nie my asem ophou nie

Shane

en daai polisieman gaan net so terug werk toe gaan, gaan niks met hom gebeur nie. Hulle almal gaan net n raps oor die vingers kry, hulle het mos maar net rondgery

ek

As hul vuurwapens gehad het is dit sameswering tot moord en roof! Nie net roof nie!!