Om te laat inent of nié – Kenners gee raad

Talle Suid-Afrikaners is steeds huiwerig om die entstof te ontvang. (Foto: Dr. Zweli Mkhize/Twitter)

Ondanks ʼn golf Covid-19-infeksies wat oor die wêreld én Suid-Afrika spoel – en inentings wat nou meer geredelik beskikbaar is vir gesondheidswerkers en diegene ouer as 60, is talle Suid-Afrikaners steeds huiwerig om die entstof te ontvang.

Berigte oor newe-effekte soos bloedklonte en nou ook hartinflammasie is boonop die afgelope week in ander lande aangemeld, wat mense verder afskrik.

Navorsing onder die breër Suid-Afrikaanse bevolking dui daarop dat amper die helfte (42%) van Afrikaanssprekendes huiwerig is om die Covid-19-entstof te ontvang. Dié syfer is veel hoër as in ander taalgroepe wat ook teen die inenting gekant is. Dít ondanks enorme veldtogte wêreldwyd om mense aan te moedig om die entstof te ontvang.

Dié mense is nie noodwendig heeltemal verkeerd in hul versigtige benadering nie, meen dr. Nathi Mdladla, medeprofessor en hoof van die intensiewesorgeenheid by die Dr. George Mukhari- akademiese hospitaal én die Sefako Makgatho-universiteit.

Mdladla sê normaalweg sou pasiënte individueel ingelig word oor die voordele of nadele van enige ingryping – en dié mediese aanbeveling sou gedoen word op grond van ʼn individu se persoonlike omstandighede en behoeftes.

“Mense moet die voor- en nadele van die entstof teen mekaar opweeg en dan besluit of [die ontvang van die entstof] die regte keuse vir hulle is. Daar is groot sosiale druk op mense om die entstof te ontvang – of hulle nou gemaklik is daarmee of nie. Uiteindelik berus die besluit by jóú.”

Kommer oor newe-effekte

Mense staan vandeesweek tou om die entstof by ‘n kliniek in Pretoria te ontvang. (Foto: Maroela Media)

Mdladla sê ondanks oënskynlike pogings om moontlike newe-effekte van die entstof gering te skat, moet dit nie buite berekening gelaat word nie. “Medici sien beslis berigte van komplikasies en selfs al is dit skaars, gaan die komplikasie nie die ‘breër gemeenskap’ raak nie, maar die individu.”

Probleme met bloedklonte nadat iemand die entstof ontvang het, is een van die newe-effekte waaroor tot dusver heelwat berig is. Amerikaanse gesondheidsowerhede het vandeesweek ook gesê hulle kyk na ʼn klein aantal berigte van hartinflammasie in sommige jonger mense wat die Covid-19-entstof ontvang het, maar dat daar in hierdie stadium geen duidelike verband tussen die twee getrek kan word nie.

Die Wêreldgesondheidsorganisasie (WGO) sê soos enige ander entstof, kan die Covid-19-entstof ook “matige” newe-effekte soos koors, moegheid, kopseer, spierpyn, rillings, diarree en pyn waar die inenting toegedien is, veroorsaak. Volgens die organisasie verdwyn die meeste newe-effekte binne ʼn paar dae. “Meer ernstige of langdurige newe-effekte is moontlik, maar uiters skaars.” Die WGO sê ook entstowwe word deurlopend gemonitor.

Dr. Angelique Coetzee, voorsitter van die Suid-Afrikaanse Mediese Vereniging (Sama), sê newe-effekte is ʼn werklikheid van enige entstof, maar dat vreemde probleme beslis nie eers jare later gaan kop uitsteek nie. Talle mense is besorg omdat Covid-19 ongekende terrein is. Die entstof is nuut en word nie so maklik vertrou soos entstowwe wat al jare lank sonder twyfel gebruik word nie.

Sy sê egter indien anafilakse intree, dus ʼn dodelike newe-effek, gebeur dit binne die eerste halfuur van toediening. Mense wat moontlik ander newe-effekte opmerk, sal dit binne twee weke sien, maar niemand gaan weke of selfs jare later vreemde newe-effekte opmerk nie, sê sy.

Voordele van die entstof

Coetzee stem saam dat die ontvang van ʼn entstof by die individu berus, maar waarsku ook dat die voordele verbonde aan die gebruik van die entstof veel groter is as enige moontlike negatiewe uitwerking.

“Jy moet oortuig wees dat dit die regte keuse is. As jy dit nie wil ontvang nie, moenie. Jy moet egter jou risiko’s teenoor die voordele opweeg,” sê sy.

“As jy byvoorbeeld ouer as 60 is, met geen chroniese siektes nie, nie oorgewig is nie, ʼn baie goeie mediese fonds het en jou polis en testament op datum is, kan jy dalk die kans waag om nie die entstof te ontvang nie.”

Sy sê omdat Covid-19 ʼn nuwe verskynsel vir mense is, is hulle onseker.

Sommige mense glo boonop steeds nie dat die koronavirus werklik bestaan nie en benader die kwessie vanuit ʼn oogpunt van “indien dit nie daar is nie, hoef ek dit nie te hanteer nie”.

Coetzee sê dit is ook só dat jy steeds Covid-19 kan opdoen, selfs al is jy daarteen geïmmuniseer.

Sonder die entstof is jou kans 100 uit 250 000 om siek te word. Indien die entstof toegedien word, daal dié syfer tot 15 voorvalle uit 250 000 waar mense ernstig siek kan word of sterf.

“Dít is hoekom ons wil hê mense moet immuniseer. Jy kan by ʼn hospitaal instap en weer uitstap, of jy kan in ʼn houtkis uitgedra word.”

Lee Callakoppen, hoofbeampte van die mediese fonds Bonitas, sê dit is belangrik dat soveel moontlik mense so gou moontlik ingeënt word. “Diegene wat ingeënt is, het ʼn verminderde kans op infeksies en behoort beskerm te wees teen ernstige komplikasies. Dit beteken minder hospitaalopnames en minder sterftes.”

Hy sê daar is nog nie bepaal of die entstof kan verhoed dat ander die infeksie opdoen nie, dus is dit belangrik om steeds maskers te dra, sosiale afstand te handhaaf en hande te was.

Coetzee sê as mense steeds huiwerig is om die entstof te kry, moet hulle hul maskers dra en van mekaar wegbly.

“Neem ʼn besluit en berus daarby, maar neem ook self aanspreeklikheid vir daardie besluit.”

Ivermektien as alternatief

AfriForum en ’n doktersgroep sê dat Ivermektien duidelik voordelig in die behandeling van Covid-19 is. (Foto: Luis Robayo/AFP)

Talle mense vertrou ook eerder die gebruik van ʼn middel soos ivermektien, terwyl hulle die Covid-19-entstowwe met agterdog bejeën .

Die middel het volgens sommige bronne wel al sukses behaal. Die burgerregteorganisasie AfriForum en die doktersgroep I can make a difference het vroeër ’n dringende brief aan verskeie gesondheidsowerhede gestuur waarin gevra word dat ivermektien vir die behandeling van Covid-19 aanbeveel word.

Die twee organisasies sê hulle is genoop om die aksie te neem nadat Indië, die tweede mees digbevolkte land in die wêreld, ivermektien as behandeling vir Covid-19 goedgekeur het en ’n afname in Covid-19-verwante sterftes beleef.

Hulle wys ook daarop dat Zimbabwe ivermektien as behandeling vir Covid-19 goedgekeur het en sukses in die bestryding van die pandemie ervaar.

Luidens die verklaring word daar ook in ’n artikel in The American Journal of Therapeutics aanbeveel dat ivermektien “wêreldwyd en stelselmatig” ontplooi moet word om Covid-19 te voorkom en te behandel.

Coetzee sê veral jonger mense gebruik ivermektien en gee dit dan soms ook aan hul ouers om te gebruik.

Sy sê diegene jonger as 40 wat Covid-19 opdoen, kry dit gewoonlik in ʼn matige vorm en die simptome wyk binne twee of drie dae. Dié herstel word gereeld toegeskryf aan die gebruik van ivermektien, maar Coetzee sê die simptome sou met of sonder die gebruik van die middel in dié tyd opgeklaar het.

Sy sê die Noord-Kaap het ʼn verhoogde voorkoms van Covid-19 en bestaan grootliks uit ʼn boeregemeenskap waar ʼn middel soos ivermektien betreklik bekend is.

“Hoekom is daar so ʼn groot voorkoms van die siekte waar die middel so geredelik beskikbaar is?”

Coetzee sê ook ouer mense gaan siek word, of hulle ʼn middel soos ivermektien gebruik al dan nie.

Sy sê indien iemand die entstof ontvang, is daar boonop geen rede om ʼn middel soos ivermektien te gebruik nie.

“Moenie verwag jy gaan nie siek word [as jy ivermektien gebruik] nie. As jy siek voel, gaan spreek jou dokter. Moenie met die vals vertroue – en dit ís vals vertroue – rondloop dat jy veilig is nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

50 Kommentare

Karel Kobus Kruger ·

Ek is nie huiwerig nie. Ek sien net nie die noodsaaklikheid daarvan nie. Ek het covid gehad (wel, ek het positief getoets), en slegs geringe simptome gehad. Om die waarheid te sê, ek het met party verkoues al erger gevoel. So waarom die moeite doen? En my vel is 51 jaar oud, so ek is immuun teen sosiale druk. “Guilt trips” werk nie op my nie.

Marissa ·

Ek stem saam! Coetzee hierbo se woorde:” Jy kan by ʼn hospitaal instap en weer uitstap, of jy kan in ʼn houtkis uitgedra word” is pure GUILT TRIP!

MakersMark ·

Daar is altyd warm koolblare op die longe wat die infeksie sal “uit trek” of dalk suurlemoensap en heuning vir die hoesie wie het inentings nodig ?

Francois Le Cochon ·

My boereraat boek van 1897 beveel ‘n pas geslagte warm dassievel op die bors aan, om die inflimasie uit te trek.

Vrijburger ·

Ek is reeds volledig ingeent en het ook my amptelike “Vaccination Record Card”, maar ek sien geen rede om neerhalend, neebuigend te wees teenoor mense wat van my verskil nie.

Fritz ·

Vrijburger, my antwoord op jou kommentaar:
He who strikes the first blow admits he’s lost the argument. Chinese gesegde

MakersMark ·

Francois ek is heavy sarkasties. Deel my resepte met die wat glo die inenting in van die antichrist…….

Jedi Knight ·

Diegene met n swak immuniteit het inentings nodig. En die bangjanne. Asimptomatiese mense en diegene met ligte simptome (die meerderheid dus) het nie eens bg. boererate nodig nie.

MakersMark ·

Ja sê dit vir die 3.6 m mense wat daarvan oorlede is en die honderde duisende met lang termyn gevolge. Groot tiere hier wat so sterk is moet maar eers wag tot hul dit self gehad het.

Jedi Knight ·

Ek het dit al gehad. Ek kon nie eintlik die verskil tussen dit en al my vorige verkoues agterkom nie.

MakersMark ·

Wees nederig en dank die Vader dat jy dit so lig gehad het en erken die feit dat ander daarvan kan sterf.

JohanR ·

Ek sal maar vr nou distansie hou, spuit, en ‘n masker dra en die inenting stof maar dophou. Daai goed net te gou op die been gebring!

Francois Le Cochon ·

Mense vat ook kanse om op ‘n dubbelstreep verby te vat. Dan sterf hulle asook onskuldigre mense. Niks anders hierso nie.

Karina ·

My dokter het Ivermektien as voorkomende maatreel voorgeskryf, medies betaal nie, 30 pilletjies kos R1070 wat ek uit my sak moet betaal. Ek het nie daardie soort geld nie! Wie kan dit bekostig?

sterk soos n beer ·

as mens vir inenting gaan dra jy steeds die virus wat die ander mense kan aansteek. jy word nie siek nie

marius ·

Hoe is die entsof saam gestel Coetzee ? Sal jy Indie toe vlieg Coetzee ?

Stof ·

Om, wetend dat die beweerde virus en die “effektiwiteit” van ‘n entstof wat deurspek is met onderliggende en kwaadwillige bestanddele en motiewe, steeds die inentting te neem, is niks anders as masogisme nie. Dankbaar dat daar massas is wat dit sien vir wat dit is en nie deur ‘n pot lensiesop verlei sal word nie.

MakersMark ·

Genuine? Wat se kwaadwillige “bestandele” is in die gereg ?

Andre ·

Lees tog biejie buitelandse nuus ook. Om net een te noem, wat maak aluminium daarin? En hoeveel inentings is al die afgelope twintig jaar getoets en as vdilig aanvaar. Indien wel, deur wie?

MakersMark ·

Wat van die eerste inenting – voor die 1800’s gedoen deur Edward Jenner teen pokke? As hy so backward denkwyse gehad het was daar nie inentings teen enige siektes vandag nie. Die inenting teen CV19 is reeds aan meer as ‘n biljoen mense gegee. Weet jy die funksie van aluminium in die entstof of is daar nog net gehoor dit is daar ? Lees ‘n bietjie meer wetenskap ipv sameswerings teorie.

Dirk Mostert ·

Lees wetenskap om te besef daar is werklik sameswering! Hierdie entstof is beswaarlik getoets. Laat jou ent en wees ‘n proefkonyn.

Jaco ·

Daar geld vir omtrent alles in SA mos twee stelle reëls, met die meer drakoniese stel vir wit mense. Wit mense is skaars 8% of minder van die bevolking en die regering is anti-wit. So net vir 2 derdes kudde-immuniteit is daardie 8% wat wit is seker klaar van inënting uitgesluit. Seker maar deel van die ewige “straf” vir apartheid.
Aangesien daar reeds 2 stelle reëls vir amper alles in SA is en aangesien wit mense reeds teen gediskrimineer word, kan die ANC maar net sowel apartheid terugbring. Gebruik corona as verskoning en isoleer die oningeënte wit mense almal in die Wes-Kaap. “dump” ons daar en maak dit ‘n apartheid-styl tuisland. Kortom, straf ons vir apartheid met apartheid. Laat buitelandse beleggings daar toe en maak belasting hoër as in die res van SA. Uiteindelik word die Wes-Kaap ‘n tipe florerende Hong Kong waaruit die res van SA ook voordeel trek.

Kobus ·

Die enigste vals vertroue is die entstof. Daar is genoeg bewyse dat Ivermektien werk, en ek ken hulle persoonlik.

Boerkind ·

As die vals media en die WGO die inentings as iets noodsaaklik beskryf, is ek sommer agterdogtig. Daar is daagliks bewyse van die erge newe-effekte van die inentings…. Waarom word die inentings deur die bank as “experimental” beskryf? Daar is ‘n wolk van wetenskaplike bewyse dat die inentings nie genoeg getoets is nie en ook nie ander gevaarlike variante sal keer nie. Ek het baie ernstige C19 gehad, was lank in die hospitaal en het nou natuurlike teenligame. Die dra van maskers word ook nie juis as betroubaar aanvaar nie – ek sien daagliks hoe baie groot groepe in townships sonder maskers loop en geen groot uitbrake van C19 ervaar nie. Nee dankie vir die ongetoetsde inspuiting.

Anel ·

Ek sal ook maar verbyhou. Is ook al 62, het hoë bloeddruk maar nog altyd gesond. Het jare terug een keer die griepinspuiting gekry. Was so siek soos ‘n hond. Was nog nooit so siek nie. Het amper in die hospitaal beland. Het sinus daarvan oorgehou, tot vandag toe. Was nog nie weer siek nie. So hoekom sal ek hierdie gemors vertrou!!

MakersMark ·

Grootste snert ooit ” as jou testament op datum is “…….waarvoor dan ?

Andre ·

Om die enstof se behandeling te dek sodat jou familie wat agterbly nie dit moet betaal nie.

MakersMark ·

Jip en die maan is van kaas. Hoeveel mense is dood aan CV19? Hoeveel is dood aan die inenting ? Of is die wiellietjie wiskunde te swaar ?

MakersMark ·

Baie groot monde oor die inentings. Gaan kyk na die massiewe afname in infeksies in lande met effektiewe inentings programme. Die wat so braaf is beweeg waarskynlik nie verder as hul voorhekkie nie maar “inentings is vir banges”. Bejammeringswaardig.

Anon ·

Chemoterapie was erg genoeg met sy eie newe effekte. Hou gerus my enstoffie vir iemand wat dit graag wil hê.

Andre ·

“Sy sê diegene jonger as 40 wat Covid-19 opdoen, kry dit gewoonlik in ʼn matige vorm en die simptome wyk binne twee of drie dae. Dié herstel word gereeld toegeskryf aan die gebruik van ivermektien, maar Coetzee sê die simptome sou met of sonder die gebruik van die middel in dié tyd opgeklaar het.”
Nou wonder ek waarom almal die eksperimentele entstof moet neem.
Waarom nie eerder met ‘n kenner wat wel Ivermectien gebruik, praat nie.
En waarom moes daar tot die hof gewend word voordat daar agtergekom word dat Ivermectien wel goedgekeur was, wie steek wat weg?

Jaco ·

Invermektien is ‘n middel wat deur wit boere besighede gemaak word. Daars bitter min regstellende aksie en BEE in die hele produksie- en verspreidingsketting van invermektien. Dís waarom dit nie teen Corona gebruik word nie.

Francois Le Cochon ·

Nee, uitgevind deur die Japanese biochemikus Satoshi Ōmura in 1970, en word vervaardig in Amerika deur die Duitse maatskappy Melck wat in 1662 al gestig is.

4ntj13 ·

Ek wil graag geënt word, maar wag nou lank al vir my SMS. Dit bly weg!

Thereza ·

ek het nou die oggend na Dr Coetzee op Radio Pretoria geluister, sy het uiters on seker van haar self geklink.

Soveel so dat dit opmerklik was vir ons almal, sy het of ni geweet waarvan sy praat ni of bloot net gese wat sy moes se.

Vir my, nee dankie. Is ni lus vir die komplikasies nie.

Irma ·

Ek het ook na haar geluister op PretoriaFM en sy was so verwaand om te se dat indien daar mense is wat nie die entstof wil neem nie moet hulle maar sorg dat hulle testament op datum is.

Andre ·

Ek is nie onverskillig nie. Ek is net moeg vir die heeltyd op my hoede wees vir liegstories op liegstories van alle kante. Die hoofstroom media loop in ‘n rigting ongeag en die altenatiewes buit dit so uit dat daar sekerlik nog meer liegstories vergader. Dit maak my moeg maar dink net. Ek laat myself inent, kan ek maar my masker afhaal? Kan ek nog steeds siek word? Gaan dit my on-aansteeklik maak? Gaan dit my help? Het ek dit nodig? Dit klink my ek word deel van ‘n massa proefneming op my koste teen my wil net omdat ‘n onbevoegde regering dit van my vra? Wag en sien, so oor drie of vier jaar sal ons weet dan vat ek die spuit, as daar nog iemand is om die spuitnaald vas te hou.

Jacobus ·

Daar behoort nie probleme te wees met enige vorm van inenting. Maar as daar blatant gelieg word oor kort en lang termyn newe effekte dan grens dit aan gevaarlike mediese wanpraktyk. Elke persoon is uniek en dit behoort die benadering te wees. Persone wat weens mediese redes nie wil gespuit word nie moenie beledig en gedemoniseer te word nie. Die mediese deskundiges begin een vir een erken daar is ‘n probleem!

MK123 ·

Ek woon in die buiteland en is ten volle ingeent met Phizer. Geen newe effekte gehad nie. Die werkgewers hier “dwing” mense basies om die inenting te kry, anders kan jy nie kantoor toe kom nie. As jy vir ‘n onderhoud gaan, is dit die eerste vraag wat gevra word, “is jy al ingeent?”, so ander werk soek in nie ‘n opsie nie. Hoeveel mense sal steeds inenting weier as hul werke daarvan afhang? Hoe gaan jy vir jou kinders sorg sonder ‘n inkomste?

Ek is nie pro- of anti-vaccine nie, maar ek kyk na die syfers en hoe die getalle afneem en hospitale glad nie onder druk is nie omdat mense nie erge simptome kry en hospitalisasie benodig nie. Ek is opgewonde om in n land te kan woon waar die ekonomie vinnig besig is om te herstel, ons kan reis, geen aanklokreels nie, restaurante floreer, en uiteindelik keer die lewe terug na normaal. Vir my was dit ‘n “no-brainer” bloot deur na die statistieke te kyk.

Theo ·

Sowat van ‘n rondvallery soos die van Dr. Coetzee, nogal leier van ‘n mediese organisasie, skep allermins vertroue. Daarby maak sy nog krasse opmerkings wat nie hoort by iemand van haar statuur en posisie nie. Is die entstowwe nou behoorlik getoets of nie? is hulle veilig of nie – of korttermyn of langtermyn? Wat kwalifiseer Dr. Coetzee om te beweer daar sal nie na twee of drie jaar komplikasies intree nie? Die middels is in ‘n tydperk van sowat vyf maande ontwikkel, nie behoorlik klinies getoets nie (neem van ses tot tien jaar vir volledige toetsing), is nood-goedgekeur vir toediening en die massas is die proefkonyne.

Johan D ·

Dr Coetzee vra hoekom die voorkoms van C-19 so hoog in die Noord Kaap, wat grootliks uit boerdery gemeenskappe bestaan, is terwyl Ivermektien geredelik beskikbaar is!
Die antwoord is dat al is dit beskikbaar wil dit nie sê dit word wel gebruik nie!

Charmaine ·

Ons sal die inenting neem, maar nie op hierdie stadium nie. Ek voel dis nog “early days” en wil eers deeglik kennis neem van newe effekte ens. Vir nou dra ons maar maskers en was ons hande.

Anoniem ·

‘n Goeie vriend van my (65) is 2 keer binne 5 maande positief getoets vir Covid 19 en het in beide gevalle matige simptome gehad. Was hy nie veronderstel om natuurlike weerstand na die eerste keer te hê nie?

Dirk Mostert ·

Wat van die LUR vir gesondheid in Gauteng, wat in Februarie geent is en 3 maande later Covid-simptome kry, positief toets en in die hospital opgeneem is? Is sy intussen ontslaan of nou in intensiewe sorg?

Danie ·

Dr. Coetzee sê: “niemand gaan weke of selfs jare later vreemde newe-effekte opmerk nie,” Ek stem saam met haar, want hoe gaan ons as leke kan bewys dit kom van die entstof af. Oor twee jaar sal hulle al baie nuwe verskonings hê hoekom iemand siek is.

Sanet ·

Ek stem saam ek vertrou eerder die ivermektien as die entstof. Duidelik weet die Dr Coetzee nie wat in die platteland aangaan nie. Daar is ‘n bietjie boere en hordes swartbewoners en hulle het nie die kennis van ivermektien nie. So sy suig duidelik die inligting uit haar duim.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.