Omikron skep nuwe vrese oor pandemie-geteisterde wêreldekonomie

Die bevestiging van Omikron het reeds tot talle reisbeperkings wêreldwyd gelei. (Foto: Phill Magakoe/AFP)

Net toe die wêreldekonomie stadigaan weer begin kop optel ná die uitbreking van die Covid-19-pandemie, het die Omikron-variant nuwe ekonomiese houe uitgedeel en reeds gelei tot ʼn rits reisbeperkings wêreldwyd.

Nadat Suid-Afrika die variant ʼn week gelede die eerste keer by die Wêreldgesondheidsorganisasie (WGO) aangemeld het, het die nuwe variant reeds wyd versprei en word dit nou oral, van Afrika en Asië tot Europa en Kanada, aangemeld – en tientalle lande het reeds reisbeperkings ingestel in ʼn poging om die verspreiding te stuit.

Die omvang van die ekonomiese uitwerking sal afhang van hoe gevaarlik die variant uiteindelik is, en hoe goed bestaande entstof dit teenwerk.

Dit beteken ekonome pas selfs in die gunstigste omstandighede reeds hul voorspellings vir volgende jaar afwaarts aan. Die Internasionale Monetêre Fonds (IMF), wat groei van 4,9% oor die volgende jaar verwag, hou nou al maande lank vol dat die koronavirus en sy variante die grootste bedreiging inhou.

Die ekonomiese uitwerking kan meer matig wees – naastenby 0,25% van wêreldwye groei in 2022 – maar net as Omikron betreklik matige simptome veroorsaak en die entstowwe doeltreffend is, sê Gregory Daco, hoofekonoom van Oxford Economics.

In die ergste omstandighede – as Omikron geweldig gevaarlik is en groot dele van die wêreld word weer in afsondering geplaas – kan groei in 2022 tot 2,3% terugsak van die 4,5% wat aanvanklik voorspel is.

Regerings kan dalk ook huiweriger wees om verdere hulppakkette beskikbaar te stel, veral as entstowwe beskikbaar is, sê Daco.

Benewens die maatreëls wat regerings kan instel om die verspreiding van die nuwe variant te stuit, kan ʼn vrees vir infeksie ook beteken dat mense self hul reise en ekonomiese bedrywighede beperk. Hulle kan byvoorbeeld minder restaurante besoek of verbruik verminder, wat weer ʼn uitwerking op groei gaan hê.

Nog ʼn gevaar is die verskaffingswaardeketting. Heelwat lugvrag word op passasiersvliegtuie vervoer.

“Indien daar kansellasies is, is daar ʼn klein vraag na kommersiële vlugte vir passasiers en handel op daardie roete kan beperk word,” sê Erik Lundh, ʼn ekonoom by The Conference Board.

In so ʼn geval kan inflasiedruk toeneem omdat sekere produkte al hoe skaarser word.

ʼn Vlaag Omikron-gevalle kan ook beteken sommige werkers kan tydelik nie aanmeld nie en ander kan afgeskrik word om aan te meld vir diens, wat huidige arbeidstekorte kan vererger.

Omikron het tot dusver meer angstigheid veroorsaak as enige ander variant sedert die ontdekking van Delta wat reeds gevaarliker as vorige variante was.

Amerikaanse pres. Joe Biden het Maandag egter gesê daar is “geen rede tot paniek” nie, selfs al het die VSA sy grense toegemaak vir reisigers uit Suidelike Afrika.

Die entstofvervaardigers AstraZeneca, Pfizer/BioNTech, Moderna en Novavax het intussen hul vertroue in die entstof se vermoë om die variant teen te werk, uitgespreek.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

26 Kommentare

jongste oudste gewildste
AW

Ja Nee !!

Andre

As al die “sieners” wêreldwyd tog net eers wil bymekaarkom en alles dieselfde sien.

Nici

Volgens dr Nick Coatsworth, voormalige federale chief health care officer in Australia, sal dit goed wees as Omnikron versprei, indien dit wel net ligte simptome teweegbring.
Ons weet reeds dat inentings die individu help tot ‘n mate maar nie verspreiding of infeksie keer nie. Natuurlike immuniteit is superior en hopelik is dit wat hierdie mutasie sal teweegbring.

Treurwilger

Suurstoftekort a.g.v. maskers het klaarblyklik ‘n beduidende invloed op angs-en paniekvlakke, veral dié van politici.
Stem saam met die persoon wat lank gelede gesê het, “Hou stil Aarde, ek wil afklim”!

Andre

Waarom word daar nog altyd van ‘n “vaccine” gepraat?