Onafhanklike skole: ‘Minister tree buite haar magte op’

Angie Motshekga. (Foto: GCIS)

ʼn Regsbrief is aan die departement van basiese onderwys gerig wat die wetlikheid van die departement se direktiewe oor die openingsdatums van onafhanklike skole bevraagteken.

Die departement het Vrydag regulasies in die Staatskoerant gepubliseer waarvolgens private skole op 1 Februarie heropen. Daar is op 15 Januarie aangekondig dat openbare skole eers op 15 Februarie heropen weens die koronaviruspandemie.

Solidariteit het die regsbrief aan die departement gerig aangesien hy meen die departement het geen seggenskap oor die datums waarop onafhanklike skole mag oop- of toemaak nie.

“Die pandemie gaan nog lank duur en ʼn onregmatige besluit nóú kan ʼn presedent vir magsmisbruik in die toekoms skep,” sê dr. Dirk Hermann, bestuurshoof van Solidariteit.

In sy regsbrief wys Solidariteit die minister, Angie Motshekga, daarop dat sy nie by magte is om sodanige direktiewe uit te reik wat onafhanklike skole tot hierdie stappe verbind nie en dat dié magte net by die minister van samewerkende regering berus. Gevolglik is die uitreiking van sodanige direktiewe deur die DBO in werklikheid ongeldig. Solidariteit dring voorts daarop aan dat die regering die direktiewe dienooreenkomstig moet aanpas en teen nie later nie as 16:00 op 25 Januarie in die Staatskoerant moet publiseer.

Dr. Dirk Hermann, bestuurshoof van Solidariteit.

“Die minister tree buite haar magte op. Om nou aan te kondig dat onafhanklike skole nog ʼn week moet wag voor hulle mag oopmaak of skole wat reeds oop is weer moet toemaak, is onregmatig. ʼn Pandemie regverdig nie onregmatige besluite nie,” voer Hermann aan.

Onafhanklike skole het unieke omstandighede wat in ag geneem moet word en is in baie gevalle kleiner skole en anders as by openbare skole word hul onderwysers nie deur die staat betaal nie. ʼn Uitstel van die skooljaar stel dié groep uitermatig bloot, meen Hermann. Die meeste van hulle is in staat om streng Covid-19-protokolle te volg en het reeds sodanige maatreëls ingestel. “Nie een van hierdie skole wil onverskillig teenoor die virus wees nie. Hulle wil wel ʼn balans bewerkstellig tussen die beste belang van die kind, die volhoubaarheid van die skool, almal se gesondheid en goeie onderwys.

“Daar is verskeie skole wat kan oopmaak wat nou gestraf word bloot omdat ander skole, wat nie aan protokol voldoen nie, nog nie gereed is nie. Pleks dat die minister haar daarvoor beywer om ander skole op standaard te bring en die impak van sluitings te beperk, is sy nou besig om die skade so wyd as moontlik te versprei,” sê Hermann.

(Argieffoto: ANA)

Die oop- en toemaak van skole het weinig impak op die Covid-19-infeksiesyfer en navorsing en verskeie aanbevelings van kundiges, onder wie die VN se kinderfonds (Unicef), voer steeds aan dat skole moet oopmaak en slegs as laaste uitweg gesluit moet word, meen Hermann. Aktiewe gevalle van Covid-19 in Suid-Afrika neem ook reeds vir langer as ʼn week daagliks af.

“Dit is duidelik dat hierdie direktiewe nie in die beste belang van onafhanklike skole, hul onderwysers of hul leerlinge is nie, maar eerder ʼn politieke instrument geword het waarmee sekere LUR’e hul mag wil afdwing. Hierdie direktiewe strook ook nie met die uitsprake wat die adjunkminister van basiese onderwys op die mediakonferensie van 15 Januarie gemaak het nie, maar eerder met die boelietaktiek van Panyaza Lesufi, soos onlangs by Helpmekaar Kollege en Curro gesien is. Dit gaan duidelik nie oor die virus nie, maar oor sentrale beheer,” sluit Hermann af.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Boerkind

Al meer en meer voldwonge bewyse dat die “reënboognasie” ‘n pypdroom is…. Sover in die mengelmoes politiek lyk dit nie of ons vorentoe beweeg het nie…. Geen stelsel waar “all sizes fits all” kan werk nie – daarom word dit met geweld op ons geforseer ( dink maar aan Patel se onsinnige kleredrag beleid). Selfs nie eens die grondwet word meer gehoorsaam nie – net die hier en nou wette soos dit “opgemaak” word…..

Willem

Ek wonder wat van privaat in privaatskole verstaan die minister nie

Maria

Opleiding in die staatsdiens se hande is haglik. Die dept ven gesondheid het alle verder kursusse vir verpleegters/verpleërs opgeskort. ook in privaathospitale. Hoop Solidariteit pak hierdie probleem ook. Sol-tech en Akademia is bakens. Groot asseblief.

Waar

“.. dat dié magte net by die minister van samewerkende regering berus.” en dis Dhlamini-Zuma so dink julle sy gaan dit verstaan? Haibo

PH

Die regering weet dat die Graad 12’s van baie van die onafhanklike skole reeds hulle eksamens in Mei skryf. (Dié wat hoë standaard oorsese leerplanne volg) Deur dié skole te “verbied” om oop te maak, pas hulle goed om standaarde af te dwing na hulle vlak toe.