Die Onafhanklike Polisieondersoekdirektoraat (Opod) doen ʼn ondersoek nadat ʼn 37-jarige selfoonverkoper agter in ʼn polisievangwa dood is.
Moses Dlamini, woordvoerder van Opod, het gesê die voorval het op 3 November gebeur. Polisiebeamptes het inligting ontvang dat die man buite die Pick n Pay in Hoofweg, Rondebosch, selfone verkoop het. “SAPD-lede het die inligting opgevolg en die man op die toneel met die selfone gevind,” het Dlamini gesê.
Polisiebeamptes het vermoed dat die selfone gesteel is en het die man in hegtenis geneem. “Die polisiebeamptes het die man agter in die patrollievoertuig gelaai met sy hande agter sy rug geboei. Met hul aankoms by die polisiestasie omstreeks 18:10 het die SAPD-lede die voertuig se deur oopgemaak en die man uit die voertuig gehelp.”
Dlamini het gesê die beamptes het gesien die man sukkel om asem te haal en het die paramedici ontbied. Paramedici het die man op die toneel dood verklaar.
ʼn Nadoodse ondersoek is op 4 November gedoen kort voor die verdagte, wat ʼn Moslem is, begrawe is. “Die oorsaak van dood is nog nie bekend nie. ʼn Geregtelike doodsondersoek word gedoen,” het Dlamini gesê.
Niemand is nog in hegtenis geneem nie.
Gaan die man ook nou ‘n hero word soos Steve Biko wat onder dieselde omstandighede dood is ?