Ondersoek ná kleuter glo in isolasiesaal verkrag word

Die Dr. George Mukhari-hospitaal in Pretoria. (Foto: Thobile Mathonsi/ANA)

Die polisie in Gauteng sê hy het begin met ʼn ondersoek na bewerings dat ʼn tweejarige kind verkrag is terwyl die kleuter in ʼn Covid-19-isolasiesaal in die Dr. George Mukhari-hospitaal in Pretoria was. Die polisie het die kind se ouers boonop glo van bakboord na stuurboord gestuur toe hulle ʼn saak aanhangig wou maak.

“Die Gautengse polisiebestuur neem kennis van die bewerings en beskou dit in ʼn baie ernstige lig. Die waarnemende provinsiale polisiekommissaris in Gauteng, genl.maj. Johan Ndlovu, het opdrag gegee dat ʼn departementele ondersoek dringend na die bewerings gedoen word,” het brig. Mathapelo Peters, Gautengse polisiewoordvoerder, gesê.

Die uitslag van dié ondersoek sal die weg vorentoe bepaal, het sy gesê.

“Ons kan bevestig dat ʼn saak van verkragting van ʼn minderjarige in Ga-Rankuwa aanhangig gemaak is en die ondersoek word geprioritiseer in ooreenstemming met die polisie se voorneme om die ondersoeke na misdaad teen vroue en kinders te prioritiseer.”

Peters het gesê die kind se ouers sal op hoogte van verwikkelinge gehou word.

Die Gautengse departement van gesondheid het Maandag gesê die hospitaal ondersoek die bewerings dat die dogtertjie in die saal verkrag is. Amptenare het aanvanklik ontken dat hulle enigiets van die beweerde voorval weet – iets wat die kind se gesin as ʼn infame leuen bestempel het.

ʼn Tante van die kind het Maandag volgehou dat die kind by die hospitaal verkrag is. Die dogtertjie is op 15 Junie deur ʼn kliniek in Soshanguve na die hospitaal verwys nadat sy gesukkel het om asem te haal. Sy sou ook ʼn Covid-19-toets by die hospitaal ondergaan.

Volgens haar het hospitaalpersoneel gesê die dogtertjie het moontlik die nuwe koronavirus onder lede en dat sy in isolasie gehou moes word. Haar ma is aangesê om huis toe te gaan. Die hospitaal het later die nag gebel en gesê die kind huil van pyn. Later het nog ʼn oproep gevolg dat sy nou slaap. Die volgende oggend het die hospitaal haar ma weer gekontak, gesê dat die dogtertjie negatief vir die virus getoets het en dat sy huis toe moet gaan.

Maar die kleuter was net nie haarself nie. Sy het moeilik geloop, vreemd opgetree en deurlopend gehuil. Die ma het ook ʼn vreemde vloeistof op die kind se private dele gesien toe sy haar doek geruil het.

“In die daaropvolgende dae het sy geweier om te speel en heeltyd gehuil. Nadat haar ma nadere ondersoek ingestel het, het sy besef daar is met die kind gepeuter. ʼn Mens kon maklik sien dat daar penetrasie was.

“Hulle het die kind se pa laat kom wat gesê het hulle moet haar die volgende dag na ʼn hospitaal neem. By die KT Motubatse-kliniek het die verpleegster gesê daar is aanduidings dat die kind gemolesteer is en dat sy na die Dr. George Mukhari-hospitaal teruggeneem moet word.”

Volgens die tante moes die gesin daar talle vrae beantwoord en het die hospitaalpersoneel hulle van een plek na die volgende gestuur.

“Die hospitaal het later die Ga-Rankuwa-polisiestasie gebel, maar niemand het opgedaag nie. Ek het besluit dat ons na die polisiestasie moet gaan om die beamptes te gaan sien omdat hulle te lank vat. By die polisiestasie is ons beveel om te wag omdat hulle met ʼn skofruiling besig was.

“Ons is aangesê om te sit en te wag. Ek het gevra hoekom hulle 17:00 skofte ruil, maar elke polisielid wat ek genader het, het gesê hulle is op pad huis toe. Elkeen het ʼn verskoning gehad tot ʼn sersant genaamd Neo ons gehelp het.”

Volgens die tante het die polisie gesê hulle kan nie veel doen nie omdat die klagte “in die aand” aanhangig gemaak word.

“Hulle het gesê voorvalle van kindermishandeling benodig die dienste van die eenheid vir gesinsgeweld, kinderbeskerming en seksuele oortredings en dat daardie persoon nie by die polisiestasie was nie. Die betrokke persoon is gebel, maar het gesê hulle is moeg. Daar was net te veel verskonings. Ons is aangesê om huis toe te gaan en dat die polisie ons die volgende dag sal besoek.

“Niemand het opgedaag nie.”

Volgens die tante het niemand tot nou, twee weke later, enige vorm van hulp aangebied nie. In ʼn stadium is sy ook vertel dat die saakdossier vermis word.

Kwara Kekana, woordvoerder van die departement, het gesê daar is ʼn voorlopige verslag na die beweerde voorval en dié verslag is aan die Gautengse gesondheidsdepartement se hoofkantoor oorhandig. Kekana het verdere navrae na die polisie verwys.

Kekana het daarna gesê die hospitaal was deurlopend in verbinding met die kind se gesin en sou met hulle vergader.

Kekana het die versekering gegee dat veiligheid by staatshospitale ʼn prioriteit is, ten spyte van die beweerde voorval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Genis

Liewe aarde, wat nog? Waar is die staff in die hospital? Of was dit een van hulle? Die SAPD se afwesigheid en onbevoegtheid is soos gewoonlik skokkend!

Leeuwyfie

Hierdie maak my briesend. Dat hierdie lede polisie genoem word is ‘n skande. Dis wat kom as mense net werk vir ‘n salaris en geen passie of empatie het nie. Mag hulle as ‘n voorbeeld gestraf word. Aan die ouers gaan my hart uit. Julle het die beste probeer doen vir jul kind. Baie sterkte daar. Mag hierdie ook ‘n waarskuwing wees aan alle ouers vir die toekoms, dring aan om by jou kind te bly en isoleer saam met hulle. Die wette van ons politici, staatsdepartemente ens. mag nooit tussen jou en jou kind kom nie. Dit druis in… Lees meer »

Gemaskerde Sopbeen

Dis doodgewoon skokkend onaanvaarbaar. Eerstens moes die kind veilig in die hospitaal wees. Tweedens moes die owerhede onmiddelik opgetree het.
Kom ons hoop maar dat die “ondersoek” ‘n aanvaarbare uitslag sal hê.
Sterkte aan die ouers en veral die kind. Ek hoop daar word vir jou gebid. Hierdie is gewone landsburgers en moet net soveel aandag geniet soos alle mense in die land indien die ANC Regering enigsins omgee.

Faraway

Langer kan ek NIE MEER STILBLY NIE! Hierdie dinge maak my siek en my hart klop onreëlmatig net by die lees hiervan!!! Hoe kan enige persoon of Polisieman net nie omgee nie al is hy van skof af . . . BEHOORT HY NIE VAN ALLE MENSE ALS TE LOS EN DADELIK TERWILLE VAN DIE ARME KIND OP TE TREE NIE!!!!!!!! Ek wens ek kon die kind teen my vasdruk en koester en versekering gee dit was als net n verskriklike nare droom!!! HERE GOD SIEN HIERDIE SMART AAN WAT AAN AL ONS KINDERS GEDOEN WORD EN WEE DIE EEN… Lees meer »

Oom Hennie Pennie

Hou my vas want ek sal moor!