Ondersoek na Willemse-voorval begin dán

Ashwin Willemse. Foto: SuperSport

Die Menseregtekommissie (MRK) se formele en openbare ondersoek na aantygings van rassisme by SuperSport en die omstandighede wat daartoe gelei het dat die oud-Springbok Ashwin Willemse vanjaar tydens ʼn regstreekse uitsending van die stel af gestap het, sal na verwagting volgende jaar aangehoor word.

Tydens die ondersoek in Februarie volgende jaar sal onder meer gekyk word na wat aanleiding gegee het tot die voorval waarby Willemse en mede-SuperSport-aanbieders Naas Botha en Nick Mallett betrokke was, berig TimesLive.

Gail Smith, MRK-woordvoerder, het by navraag aan Maroela Media gesê: “Die MRK het in hierdie stadium geen kommentaar op die saak te lewer nie.” Gevra waar ander media aan die inligting kom, het sy gesê net hulle sal kan sê.

Die kommissie sal ook ondersoek instel “of die omstandighede rakende die gewraakte voorval Willemse se waardigheid of enige fundamentele regte geskend het”.

Van die ander vrae wat die ondersoek moet opklaar, is of Willemse blootgestel is aan “onregverdige rassediskriminasie” op of voor 19 Mei 2018 en daarna tydens die uitvoering van sy pligte as kommentator vir SuperSport.

Ook moet vasgestel word of SuperSport behoorlik opgetree het nadat beweer is Willemse was die slagoffer van onregverdige rassediskriminasie.

Volgens TimesLive moet die MRK voorts bepaal of SuperSport deur optrede of versuim om op te tree ʼn omgewing geskep het wat bevorderlik was vir spanning, onenigheid of onregverdige rassediskriminasie onder sy werknemers of kontrakteurs of tussen die bestuur en werknemers en kontrakteurs.

Die kommissie beplan om ʼn paneel aan te stel wat tydens ʼn openbare verhoor vrae aan getuies sal stel. Geskrewe sowel as mondelinge voorleggings van SuperSport en ander belanghebbendes sal aanvaar word.

Die ondersoek begin op 25 Februarie en sal na verwagting teen einde Junie afgehandel wees.

Willemse se kontrak met SuperSport het in September vanjaar verval. Hy het in Julie gesê hy sal wag op die verhoor van die MRK om sy “geldige pyn” te deel.

Hy het vroeër in ʼn onderhoud op 702 en CapeTalk kortliks gepraat oor sy besluit om nie aan die bemiddelingsproses by SuperSport ten opsigte van konflik tussen hom en sy medeaanbieders, Mallett en Botha, deel te neem nie.

Hy het Mallett en Botha van rassisme beskuldig, en nadat SuperSport ʼn ondersoek na die beskuldigings van stapel gestuur het, het Willemse gesê die ondersoek is “nie die gepaste forum om die kwessie te bespreek nie”.

SuperSport het tydens sy interne ondersoek na die voorval bevind daar was geen rassistiese optrede deur Botha en Mallett nie, asook geen geheime of openlike rassisme wat tot die voorval gelei het nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Anoniem

Fooitog en nou kry almal HOM jammer, ons kyk nou tog te lekker na die rugby en sport se ontledings ! Dankie

Gert

Willemse moet die fout by homself gaan soek, maar dit is mos deesdae die norm, doen enigeiets en as daar n lawaai is na die tyd, dan blameer jy rassisme!! Dit is om van naar te word.

Johan

Nee kyk. As daar nou al ooit ‘n holrug geryde stotie was, dan is dit hierdie een

Sparkplug

Willemse soek net geld…dis die enigste rede hoekom hy so aangaan. Ons soek hom nie terug op die kassie nie. Supersport moet weet as ek sy gesiggie op die kassie sien gaan ek my dstv kanseleer uit protes

Theresa B

Ek stem saam met jou Gert.