Ondersoek SAL se ‘gevaarlike’ entstofvlug na Brussel – DA

(Argieffoto: Unsplash)

ʼn Onafhanklike ondersoek word gevra na bewerings dat die Burgerlugvaartowerheid (BLO) ʼn beweerde 90 ton-berekeningsfout probeer verdoesel het wat glo gemaak is op ʼn vlug van die Suid-Afrikaanse Lugdiens (SAL) wat ʼn besending Covid-19-entstof in Brussel moes gaan oplaai.

Luidens berigte het die Airbus 340-600 ʼn sogenaamde “Alpha floor”-voorval – wanneer ʼn vliegtuig tydens landing of met opstyging nie genoeg stukrag het nie en begin staak – ondervind. Dit het glo gebeur omdat die gewig tydens opstyging met 90 ton verkeerd bereken is en die spoed waarteen die vliegtuig opgestyg het, dus ook verkeerd was.

Die Airbus se veiligheidstelsel is ontwerp om in so ʼn situasie oor te neem by die vlieëniers. Die stelsel het dus outomaties meer krag gelewer en die neus van die vliegtuig effe laat sak om te keer dat dit staak.

Die voorval word as “uiters gevaarlik” bestempel.

Die DA-LP’s Chris Hunsinger en Ghaleb Cachalia sê die voorval het glo op 24 Februarie tydens opstyging gebeur toe die vliegtuig op pad na Brussel in Johannesburg opgestyg het.

“Die voorval is egter eers op 17 Maart, drie weke ná die voorval, by die BLO aangemeld. Dít terwyl BLO-regulasies bepaal dat voorvalle binne 24-72 uur, afhangend van die erns daarvan, aangemeld moet word,” lui die verklaring.

Na bewering het die spesialis in beheer by die SAL die voorval as minder ernstig beskou en dit dus nie aangemeld nie.

“Die voorval het eers aan die lig gekom toe ʼn lugvaartingenieur die data opgemerk het nadat ʼn geoutomatiseerde stelsel die vliegtuig- en enjinvervaardigers daaroor ingelig en die voorval geëskaleer is,” lui die DA se verklaring.

Luidens berigte het die vliegtuig se inligtingbestuurderstelsel die inligting oor die voorval aan die SAL gestuur, wat dit glo aan die BLO deurgegee het en dat dié glo besluit het om die SAL te help om dit te verdoesel.

Die DA sê daar is ook bewerings dat die bemanning se opleiding nie gedoen is deur ʼn opleidingsinstelling wat vertroud is met die SAL se standaardbedryfprosedure nie en dat die BLO die vlug aanvanklik gehok het omdat die vlieëniers nie die nodige vlugure gehad het nie. Die vlug is eindelik toegelaat om te vertrek, maar met 13 vrystellings.

“Hoekoms is daar druk op die BLO uitgeoefen om die vlug toe te laat om te vertrek met ʼn ongekende getal vrystellings?

“Veiligheid kan nie in die gedrang gebring word nie. ʼn Vloot moet behoorlik in stand gehou word,” sê die DA.

Die party sê voorts hy neem kennis dat die BLO die voorval gaan ondersoek.

“In die lig van die oënskynlik onbehoorlike invloed wat oor die owerheid uitgeoefen is om toestemming vir die vlug te gee, glo ons die ondersoek moet onafhanklik gedoen word.”

Hunsinger en Cachalia sê hulle het reeds aan die minister van vervoer, Fikile Mbalula, in die verband geskryf.

“Die feit dat die BLO die voorval probeer onderspeel of begrawe, kan ernstige implikasies vir Suid-Afrika as ʼn lid van die internasionale lugvaartvereniging inhou wat betref ons internasionale veiligheidstandaardprotokolle.

“Dit is iets wat die Suid-Afrikaanse lugvaartbedryf bloot nie kan bekostig nie en almal wat probeer het om die voorval weg te steek, moet gedissiplineer word na ʼn deeglike, onafhanklike ondersoek.”

Die BLO het nie dadelik op ʼn versoek om kommentaar gereageer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Stefan

Maar weet die Internasionale gemeenskappe dan nog nie dat wette nie op ‘ons’ van toepassing is nie?

Pieter

Welkom in ANC sirkus land

Bertus

Ja, daai is seker net op Westerse lande van toepassing, nie op ons nie.

Michael

Dat mense nog vlugte op SAL bespreek is verstommend-hulle is ‘n ramp wat wag om te gebeur

Boohoo

Waar is die wiskunde?