Onderwyser agter tralies ná beweerde verkragting van sesjarige

(Foto: Element5 Digital/Unsplash.com)

ʼn Oos-Kaapse onderwyser is in polisie-aanhouding én geskors ná die beweerde verkragting van ʼn sesjarige leerder.

Loyiso Pulumani, woordvoerder van die Oos-Kaapse onderwysdepartement, het gesê die onderwyser van Lusikisiki is Dinsdag geskors weens sy beweerde verkragting van die leerder van die Khoto Primary School.

Die polisie het die onderwyser reeds in hegtenis geneem nadat iemand hulle van die bewering ingelig het.

“Die departement het ʼn voorlopige skorsingsbrief aan hom beteken in die polisieselle waar hy tans aangehou word,” het Pulumani gesê.

Pulumani het gesê ʼn formele tugproses gaan volg en sal gelei word deur ʼn kommissaris van die Raad vir Onderwysarbeidsverhoudinge (ELRC).

“Die ELRC sal binne twee dae van alle nodige inligting voorsien word. Dit sal insluit ʼn volledige ondersoekverslag. Weens die erns van die beweerde misdaad gaan die departementele proses nie gepootjie word deur sy aanhouding nie. Die polisie gaan gevra word om toestemming te gee dat die verhoor in die polisiekantoor, of waar hy ook al aangehou word, gehou mag word.”

Pulumani het gesê die departement het reeds berading beskikbaar gestel vir alle leerders en onderwysers by die skool.