Onderwyseres sterf ná baksteen motor tref

Michelle Pietersen (58) was ‘n geliefde en ervare onderwyseres. (Foto: Facebook)

ʼn Paarlse onderwyseres is Donderdagoggend dood nadat iemand ʼn klip na haar en haar man se motor geslinger het. Michelle Pietersen (58) was verbonde aan die New Orleans Sekondêre Skool in die Paarl.

Siyabulela Malo, polisiewoordvoerder, het gesê die egpaar was op die N1 vanaf Kaapstad na die Paarl onderweg toe ʼn “onbekende persoon uit die niet verskyn en die baksteen na die voertuig gegooi het”.

“[Michelle Pietersen] is dood verklaar weens die beserings wat sy opgedoen het,” het Malo gesê.

Die skool het op sy Facebook-blad die nuus oor Pietersen se dood gedeel en honderde boodskappe van medelye het sedertdien ingestroom. Die skool het na Pietersen as ʼn “geliefde vriendin, kollega en geliefde onderwyseres” verwys.

“Dit is ʼn geweldig tragiese en onnodig gewelddadige voorval,” het die skool gesê.

“Ons gebede is met haar man, mnr. Anton Pietersen, haar kinders en kleinkinders, asook die res van die familie.”

Volgens Malo word ʼn moordsaak ondersoek, maar niemand is nog in hegtenis geneem nie.

Die polisie het enigiemand met inligting gevra om die Paarl-polisie of die Stop Misdaadnommer te bel by 08600 10111.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
Mads

Maar ons mag nie HAAT nie!

Anti misdaad

So onmenslik en onnodig word nog n lewe beeindig deur misdaad. My innige simpatie aan familie en mag jul genade ontvang om die te verwerk. Mag geregtigheid seevier

Allie

Dis verskriklik hartseer! Om jou lewe so te verloor en op so ‘n manier – ons verdien dit nie.

Liamari

Ons gesin het in 2006 die aand so na 19:00 uit Kaapstad gery. Ons kinders was vas aan die slaap toe ons ‘n slag hoor…vanuit die bosse is ons motor ook met ‘n baksteen getref. Gelukkig die ruit net net gemis en net ‘n duik gelaat.. My pa het gelukkig kop gehou en net aan gery.

TwaalfBoor

Was dit nou ñ klip of ñ baksteen?