Ongeluk met politikus se motor eis lewe van ma

Die motor waarin ʼn politikus gereis het. (Foto: IPSS Medical Rescue/Facebook)

ʼn Ma is Maandagaand dood toe ʼn motor waarin ʼn politikus gereis het, teen haar gesinsmotor gebots het.

Die oorledene se man en twee kinders is ernstig beseer en steeds in ʼn kritieke toestand. Volgens paramedici op die toneel het die politikus en drie lyfwagte matige beserings opgedoen en is na ʼn hospitaal geneem.

Paul Herbst, woordvoerder van IPSS Medical Rescue, sê ʼn Toyota Fortuner het vroegaand teen ʼn gesin se motor op die R102 naby Gingindlovu in KwaZulu-Natal gebots.

Die Fortuner se voorkant het glo die kant van die gesin se motor getref. Die ongeluk het oënskynlik teen ʼn hoë spoed plaasgevind.

Die kant van die gesin se motor is getref. (Foto: IPSS Medical Rescue/Facebook)

Herbst het aan Maroela Media bevestig die speaker van die Ilembe-distriksmunisipaliteit, ook ʼn vorige burgermeester van een van die munisipaliteite in die provinsie, in die Fortuner was. Die speaker se veiligheidspan was ook in die motor ten tyde van die voorval.

Herbst sê paramedici is kort ná die ongeluk na die toneel ontbied.

“ʼn Man en twee seuns is op die toneel gestabiliseer en na ʼn hospitaal geneem vir behandeling.”

Die vrou het egter aan haar beserings beswyk en is op die toneel dood verklaar.

“Polisiebeamptes was op die toneel en ondersoek die saak verder,” het Herbst gesê.

Maroela Media het vroeër berig die burgemeester van die Naledi- plaaslike munisipaliteit, Neo Schalk, is vandeesmaand in ʼn trompop botsing op die N14 buite Vryburg dood. Die bestuurder van die ander motor in die botsing is ook op die toneel dood verklaar.

Twee mense, asook die nuutverkose burgemeester van Johannesburg, Jolidee Matongo, het verlede maand verongeluk. Twee van Matongo se lyfwagte het die ongeluk met ernstige beserings oorleef.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
Linda

Alweer politieke voertuie betrokke.

Pablo

Ek wonder hoeveel van die mense in die ongelukke bestuurders lisensies het en bevoeg is om te bestuur.

Bernard

Dis omdat al hierdie sogenaamde politikuste se motors en motorbestuurders soos besetenes bestuur.

JohanR

Sit die blou lig aan, die politikus wat dink hy/sy is eintlik belangrik in die wereld klim in die agter sitplek, ‘n lyfwag skyf agter die stuurwiel in en dan is dit voet in die hoek en daar is ‘n Ma nou dood.

Toetie

Dagvaar die rook uit hulle uit, want hulle moet nog steeds die verkeerswette gehoorsaam. Onbevoegde bestuurders dit is die probleem. Hulle kry opleiding plul dt dan, maar word nog steeds gebruik in die bloulig bende.