‘Ongewenste geskenk’ nou sy been kwyt

Die hondjie kan skaars loop nadat sy gebreekte been sonder behandeling skeef aangegroei het. Foto: DBV

“Die meeste van ons weet hoe dit voel om opgewonde oor ʼn geskenk te wees, maar hoe maklik dit dan is om ʼn paar dae later daarvan te vergeet. Dis veral waar wat troeteldiere betref.”

Só sê die Bloemfonteinse DBV na aanleiding van ʼn klagte wat hulle onlangs oor ʼn hond met ʼn gebreekte been ontvang het. “Ons het gereageer en afgekom op ʼn klein beseerde dachshund.”

Toe hulle by die eienaar wou weet wat met die hondjie se been gebeur het, het sy vertel haar suster se kêrel het die hond geskop terwyl hy besope was. “Ongelukkig het ons geen bewyse of getuies van die voorval nie,” sê die DBV.

Hulle het die kêrel gevra wat gebeur het, maar sy weergawe het van sy meisie se suster sʼn verskil. “Toe ons hulle verder uitvra,” vertel die DBV, “het dit geblyk dat die hondjie se been reeds drie weke vantevore gebreek is.”

Die eienaar het vertel hulle het die hondjie na die veearts geneem, wat hulle twee opsies gegee het: Hulle kon die been laat amputeer óf dit met ʼn groot operasie laat regmaak. Albei opsies was duur.

Sy was nie van plan om geld te mors op ʼn hond wat sy geskenk gekry het nie.

Die dachshund se been sal geamputeer moet word nadat sy eienaar geweier het om geld aan sy behandeling te bestee. Foto: DBV

“Toe ons die eienaar vra hoekom hulle nie die hondjie gehelp het nie,” vertel die DBV, “het sy gesê sy kon dit nie bekostig nie. In elk geval het sy die hond by ʼn vriend present gekry en was sy nie van plan om geld te mors op ʼn hond wat sy geskenk gekry het nie.”

Sy het beweer die hond het nie pyn nie omdat hy op die been kan trap. “Maar toe ons die hondjie dophou, het ons gesien hy kan skaars loop,” sê die DBV.

Hulle het ʼn waarskuwing aan die eienaar uitgereik om die hondjie so gou moontlik te laat behandel, maar met ʼn opvolgbesoek het hulle gesien sy het nog niks gedoen nie.

“Die eienaar het volgehou sy was nie van plan om geld te bestee aan ʼn hond wat sy present gekry het nie,” vertel die DBV. Sy het ook gesê sy sou nie die been laat afsit nie, “want sy wou nie ʼn gebreklike hond hê nie”.

Al uitweg was vir die DBV om op die hondjie beslag te lê en hom na die veearts vir X-strale te neem. Sy been is by die dybeen gebreek, maar omdat die eienaar so lank getalm het, kan die been nie meer behandel word nie en sal dit geamputeer moet word.

Die DBV sê die prosedure en die nasorg sal sowat R5 000 kos. Daarom vra hulle dat enigeen wat ʼn bydra wil lewer, “Bloemspca” na 42646 SMS om R30 te skenk.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

51 Kommentare

jongste oudste gewildste
Esta

Please share the owners details. This should be name and shamed! ?

Ann

Nee werklik, die vrou het seker nie kinders nie. Sy sou dalk dieselfde gereageer het … in elk geval, wie skop ʼn hond vir g’n rede nie?
O nee wag, hy was gesuip …

T

Ek raak so kwaad om sulke dinge te lees, wil daai persoon skop en los met n gebreekte been vir 3 weke!! Hel het n spesiale plek vir sulke idoite.

Arme Hond

Hoop die vriend wat haar die hondjie as geskenk gegee het los haar..Ek hoop almal wat hier lees maak ‘n bydrae ek het sopas!!

Ronel

Hoekom vat sy die hondjie as sy nie omgee nie. Sy het nie liefde vir n dier nie. My diere is ons lewe.naam en shame haar dt almal kan sien hoe lyk die vrou wat hartloos is.