“Ons is jammer,” sê Spur

Argieffoto

Pierre van Tonder, die uitvoerende hoof van die Spur, het Maandag onvoorwaardelik om verskoning gevra oor dié restaurantgroep se optrede teenoor hul kliënte in die rasse-debakel wat steeds om Spur se kop woed.

“Ons het besef dat ons die afgelope paar maande nie na ons kliënte geluister het nie. Die onlangse konfrontasie tussen twee kliënte en die gevolglike reaksie, het ʼn kragtige boodskap tuisgebring en dit is dat ons gehoor moet gee aan ons kliënte se behoeftes en hul frustrasies,” sê Van Tonder.

In ʼn mediaverklaring op die groep se webwerf het hy ook gesê hulle het besluit om die werksaamhede van die paneel deskundiges wat aangestel is om die onlangse Spur-rasseinsident en Spur se hantering daarvan te ondersoek, voorlopig “op ys te sit” terwyl Spur se topbestuur eerder self die land gaan deurkruis om na die insette van konsessiehouers en kliënte te luister.

Spur het in April besluit om dié paneel aan te stel wat na voorleggings uit die publiek sou luister om die restaurantgroep te help bepaal of hulle reg opgetree het toe hulle besluit het om ʼn man alle Spur-restaurante te belet ná ʼn heftige woordewisseling tussen hom en ʼn vrou in Maart in die Texamo Spur in die suide van Johannesburg. Die nadat hy beweer het haar kind het sy kind geklap. Die voorval is op video vasgelê en het soos ʼn veldbrand versprei terwyl dit ʼn rasseherrie op sosiale media ontketen het.

Die vakbond Solidariteit en die burgerregte-organisasie AfriForum het verlede week ʼn uitnodiging om ʼn voorlegging te maak aan die paneel wat die Spur-voorval ondersoek, van die hand gewys omdat hulle die paneel as “bevooroordeeld en subjektief” beskou. Dr. Dirk Hermann, bedryfshoof van Solidariteit, het toe aanbeveel dat Spur eerder fokusgroepe met kliënte en konsessiehouers moet hou om te bepaal hoe hulle voel.

“Ons aanvaar dat ons erkenning moet gee aan die mening en sentimente van beide die publiek en ons konsessiehouers met betrekking tot die insident en ons optrede,” sê Van Tonder. “Hiermee vra ons dan ook onvoorwaardelik om verskoning aan enige persoon of gemeenskap wat aanstoot geneem het weens ons optrede en sal in die toekoms verseker dat daar ʼn regverdige verhoor plaasvind voor enige oordeel of uitspraak gemaak word.”

Van Tonder het gesê die publiek se reaksie en insette op grondvlak het Spur oortuig dat daar meer waarde daarin lê om na die groep se konsessiehouers en die publiek – hul kliënte – te luister.

Hy het ook gesê die groep het besluit om onmiddellik ʼn taakspan aan te stel om die speelareas vir kinders by hul restaurante veiliger te maak. “Daar sal ook meer personeel aan diens wees tydens besige periodes. Konsessiehouers sal ook opleiding ontvang in konflikhantering.”

Van Tonder het verder gesê die Spur wil nie in politieke debatte betrokke raak nie. “Ons sal fokus op dit wat die restaurant die afgelope 50 jaar ʼn eg en gewilde Suid-Afrikaanse instelling gemaak het – ʼn plek waar families van alle gemeenskappe veilig en plesierig kan verkeer. Die lesse uit die voorval sal tot uitbouing van hierdie fokus dien.”

Hy het verskoning aan Spur se konsessiehouers gevra en erken dat hulle nou onder druk verkeer sonder dat hulle enigiets verkeerd gedoen het. “Spur sal hulle bystaan om weer die persoonlike verhoudinge in hul onderskeie gemeenskappe te herstel. Ook aan hulle rig ons ʼn opregte verskoning.”

Hermann het die besluit van Spur om op ʼn “luistertoer” te gaan geloof en as ʼn groot stap vorentoe beskryf vir konsessiehouers, personeel en kliënte.

“Kliënte het die afgelope tyd gevoel Spur luister nie na hulle nie. Hulle wil gehoor word. Spur is ʼn familierestaurant en familielede luister na mekaar. Kliënte van Spur was meer as kliënte, hulle was deel van die ‘tribe’ en hulle voel die ‘chiefs’ het hulle verraai. Dit is dus nou goed dat die ‘chiefs’ in hul karre klim en gaan luister.”

Hermann het ook die Spur se besluit om die werksaamhede van die paneel op ys te plaas verwelkom, omdat hy glo die Spur se antwoorde sou nie van “bo vanuit ʼn paneel kom nie, maar eerder van onder af van gewone kliënte”.

“Spur was vir ons as kliënte meer as ‘n restaurant: dit was die plek waar ons kinders partytjies gehou het, waar roomys gebring en gesing is as ons verjaar, waar kelners vir ons dans en die kinders lekker en veilig speel. Ons sal graag vir die ‘chiefs’ wil sê hoe ons voel. Ek gaan self vra om met die ‘chief’ te praat, want ek wil hê hulle moet verstaan wat met hulle gebeur het.”

Volgens Hermann het hulle die afgelope weke met tientalle konsessiehouers gepraat en sal hulle graag saam met hulle wil soek om ‘n oplossing te kry. Die meeste konsessiehouers kom uit die gemeenskappe waar hul Spur-restaurante geleë is.

“Ons moedig gemeenskappe aan om in gesprek met konsessiehouers te tree om te kyk of die vertrouensverhouding met die gemeenskap herstel kan word. Spur se topbestuur se verskoning en hulle besluit om op ‘n luistertoer te gaan, maak dit vir konsessiehouers en hul gemeenskappe moontlik om in gesprek te tree.

“Die herstel van verhoudinge met die ‘tribe’ sal van onder af tussen konsessiehouers en die gemeenskap moet geskied. Dit is egter nog ‘n pad. Indien versoek sou word, sal ek as fasiliteerder tussen plaaslike konsessiehouers en gemeenskappe optree. My hart is by die gemeenskap, konsessiehouers en personeel. Die vraag of daar herstel tussen kliënte en die Spur-groep gaan wees, kan net beantwoord word ná die luistertoer. Die toets sal wees of Spur se topbestuur gehoor het en daaruit planne in plek gesit het om Spur weer ‘n plek te maak waar families veilig en lekker kan kuier.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

470 Kommentare

jongste oudste gewildste
Swapie

Ja toe, nou is Spur skielik jammer. Mag ek vra of die wit man en sy gesin nou weer welkom in die Spur sal wees of is hy steeds verban?

Ansa

Nee wat hou julle kos En verskonings vir julle uitgesoekte kliente. Ons stel nie belang nie.

Lou

Die jammer kom dalk te laat…..die skade is gedoen…..

Charmain

Se eers vir ons of die man onverskoning gevra gaan word en of hy weer welkom is in spur. So nie kan hul ma hul spur hou. En sommer iets doen aan hul kelners wat se. Im sorry I dont speak afrikaans. My taal en ons mense het n reg!

Helen

Stel ni belang nie dankie! Kom nog steeds nie daar nie!!