Onskuldig, sê appèlhof oor Coligny-twee

Pieter Doorewaard en Pillip Schutte tydens hul borgtogaansoek. (Foto: Jhua-Nine Wyrley-Birch)

Phillip Schutte en Pieter Doorewaard van Coligny is Vrydag in die appèlhof in Bloemfontein onskuldig bevind op al die aanklagte teen hulle.

Regter Ronnie Hendricks het die mans in Maart vanjaar skuldig bevind aan die moord op die tiener Matlhomola Moshoeu. Hulle het daarna spesiale verlof gekry om direk by die appèlhof in Bloemfontein te appelleer teen hul skuldigbevinding.

Die mans se regspan, onder leiding van adv. Barry Roux, het die appèlhof suksesvol versoek om verlof tot appèl te kry nadat die hooggeregshof in Mmabatho in Maart vanjaar geweier het om verlof tot appèl in dié saak toe te staan.

Die burgerregtegroep AfriForum het besluit om Doorewaard en Schutte se appèlaansoek te finansier nadat Bonakele Pakisi, die enigste ooggetuie in die moordsaak, teenoor vier mense erken het dat hy in die hof gelieg het. Hy het getuig dat hy gesien het hoe Doorewaard en Schutte die tiener vermoor.

“Die feit van die saak is dat AfriForum van die begin af gesê het dat die staat se enigste getuie, Bonakele Pakisi, leuens vertel het en daarom het ons die mans bygestaan. Ons het in hul onskuld geglo en geregtigheid het vandag geskied,” het Kallie Kriel, uitvoerende hoof van AfriForum, gesê.

Die mans was 13 maande in aanhouding voordat hulle op borgtog van R20 000 elk vrygelaat is.

Pieter Karsten, Doorewaard se oom, het vroeër gesê hulle het deurentyd in die mans se onskuld geglo.

“Daar is geen manier dat die duisternis van ’n leuen die lig van die waarheid sal oorskadu nie,” het hy gesê.

Ds. Tewie Pieters van Coligny, wat ná die voorval ’n leidende rol gespeel het om versoening en verdraagsaamheid in die gemeenskap te bewerkstellig, het ook gesê daar is vas in die mans se onskuld geglo.

“Dit is jammer en tragies dat die regsproses die pad moes loop waar ’n hof in Bloemfontein dit anders beskou as die een in Mahikeng.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Wielspore

Stel ‘n eis teen die staat in, hoop julle word sommer skatryk daardeur. Goeie werk deur AfriForum en dit is net weereens ‘n bewys dat die ANC en sy politieke trawante hulle toekoms op leuns en oomkopery wil bou. Sulke optrede is nie volhoudbaar en gaan tot ‘n val kom.
Lekker wenner vir die Afrikaner hierdie!

Misky

Dis die beste nuus van die week!!!! Ek is so bly vir julle Mnr Doorewaard en Schutte en dankbaar vir Afriforum wat julle bygestaan het. Dink net as hulle die straf moes uitdien en was werklik onskuldig. Hoop nou vat hulle daai liegbek Pakisi aan en hy moet lewenslank tronk toe gaan vir wat hy aan hulle wou doen.

Thom

Geluk julle twee ! Hou julle in die vervolg uit situasies uit waar die waarheid met noodlottige gevolge verbuig kan word .

JohanR

Geluk en lekker fees tyd en nuwe jaar vir die manne saam met hulle families en vriende. Dankie ook aan AfriForum en adv Barry Roux.

Marius

Baie geluk aan julle . So vang slim sy baas . Siestog . Ek hoop die NVG gaan die saak gebruik om hulle huis in orde te kry .