Ontwerper van SA vlag sterf

Fred Brownell. (Foto: Departement van kuns en kultuur)

Fred Brownell, die man wat verantwoordelik was vir die ontwerp van Suid-Afrika se post-demokratiese nasionale vlag, is Vrydag in die ouderdom van 79 dood.

Nathi Mthethwa, minister van kuns en kultuur, het Brownell, ʼn voormalige staatsheraldikus, as ʼn “patriot en nasionale held” beskryf.

“Dit is onmoontlik om die geskiedkundige toeval van Brownell se dood, so kort ná die suksesvolle afhandeling van Suid-Afrika se sesde nasionale en provinsiale verkiesings en Suid-Afrika se viering van 25 jaar van onafhanklikheid, te ignoreer,” het Mthethwa in ʼn verklaring gesê.

Mthethwa het gesê dié toeval besorg dalk aan Brownell die laaste eer vir die belangrike rol wat hy in die geskiedenis van ʼn post-demokratiese Suid-Afrika gespeel het.

Brownell het sy ontwerp destyds aan oudminister Roelf Meyer – toe die regering se hoofonderhandelaar gewys – en hy het dit aan sy ANC-eweknie, (nou pres.) Cyril Ramaphosa gewys. Daar was glo aanvanklik ʼn lang stilte, waarna applous uitgebreek het.

Oudpres. Nelson Mandela moes die ontwerp óók goedkeur. Die ontwerp is aan Mandela gefaks en iemand aan die ontvangkant moes na ʼn skryfbehoeftewinkel hardloop, inkleurpotlode kry en die vlag inkleur. “Gelukkig was mnr. Mandela gelukkig daarmee,” het Brownell vroeër gesê.

In antwoord op ʼn vraag oor wat sy ontwerp geïnspireer het, het Brownell volgehou al wat saak gemaak het, was dat die vlag ʼn plek in die harte van die oorgrote gedeelte van die bevolking vind en ʼn verenigende simbool vir die land word.

Nthathi het sy medelye met Brownell se vrou, Christine, sy dogters, kleinkinders, familie en diegene wat hom geken het, betuig.

Brownell was ook die ontwerper van onder meer die Namibiese vlag en landswapen.

  • Die ontwerp en kleure van die vlag is ʼn samevatting van die hoofelemente uit Suid-Afrika se vlaggeskiedenis. Daar is geen amptelike simboliek aan die vlagkleure (swart, goud, groen, wit, rissierooi en blou) verbonde nie. (Bron: Wikipedia)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Dries du Toit

Nogal n witman wat dit ontwerp het. Binnekort gaan dit ook n simbool wees van die onderdrukker in SA net soos ons dierbare taal en die Stem

remondo

Dis n afrikaner tradisionele wapen – n Kettie :)

Leeu

Wonder waar’s al die rasiste wat so moan oor n vlag. Afrikaners wil die ouvlag behou, en sê die hul moet stop om te moan, maar moan permanent oor die “nuwe” vlag.

Hennie

Lyk soos Winnie op haar rug!

marco polo

Ons behoort dankbaar te wees dat die laaste vlag in die prentjies gekies is en nie een van die ander nie, hulle is darem wragtag nie mooi nie. Persoonlik het ek nie n probleem met die vlag nie, dis net n vlag en identiteit as SAner in die buiteland. Ek het wel n probleem daarmee as mense my wil verbied om die ou vlag te het, wat ek terloops in China sommer op die internet kan koop. Enige bestellings?