Oorsprong van gerugte oor ‘aanval op trokdrywers’ onduidelik

‘n Vragmotor wat in Maart vanjaar aan die brand gesteek is. (Foto: Twitter)

Daar is tans geen amptelike bevestiging dat daar enige waarheid steek in gerugte dat vragmotors wat Maandag Suid-Afrika vanaf buurlande binnekom, aangeval sal word nie.

Inligting en kennisgewings word tans op sosiale media versprei waarin beweer word dat buitelandse vragmotorbestuurders Maandag aangeval sal word as hulle op Suid-Afrika se paaie ry. Sommige van die boodskappe beweer ook dat ʼn voedsel- en steenkooltekort in Suid-Afrika sal ontstaan omdat vragmotors verhoed gaan word om die land binne te kom.

Brig. Vish Naidoo, nasionale woordvoerder van die polisie, sê hy is bewus van die gerugte wat die ronde doen, maar daar is tans geen aanduiding dat daar enige waarheid in steek nie. “Ons het al twee keer vantevore vanjaar dieselfde ding gehad waar hierdie boodskappe versprei word en toe het daar niks gebeur nie. Ons vermoede is dat dit deur mense rondgestuur word wat net probeer om paniek te saai,” sê Naidoo.

Hy sê die polisie is egter voorbereid en het die nodige planne gereed om in te gryp sou daar enige iets gebeur. “Ons kan nie sê dat daar enige waarheid in die gerugte steek nie, maar ons sluit nie die moontlikheid uit nie,” sê hy.

Die vervoervakbond Satawu het intussen gesê hy distansieer hom van enige gerugte dat daar ʼn vragmotorstaking vir 1 en 2 September beplan word. “Nuus dat daar op die twee dae ʼn nasionale staking in die vragmotorbedryf sal wees, word wyd versprei. Satawu dra egter geen kennis waar hierdie inligting vandaan kom nie, aangesien nie een van die vakbonde wat by die  nasionale bedingingsraad vir die padvrag‑ en logistieke bedryf geregistreer is so ʼn staking versoek het nie,” sê die vakbond in ʼn verklaring.

“Gevolglik is ons bekommerd oor die veiligheid van vragmotorbestuurders en doen ons ʼn beroep op vragmotormaatskappye om versigtig te wees, aangesien sulke oproepe vir stakings deur gesiglose mense in die verlede gelei het tot gruwelike aanvalle op vragmotorbestuurders.”

Die International Cross-Border Traders Association Executive het intussen gesê indien daar wel enige waarheid steek in die gerugte dat buitelandse vragmotorbestuurders op 2 September aangeval gaan word, sal die instansie alle Suid-Afrikaanse vragmotors, busse en vlugte verhoed om grense na enige Afrika-land oor te steek.

“Buitelandse vragmotorbestuurders het permitte om in Suid-Afrika te werk,” sê Denis Juru, president van ICTA. “Die regering van Suid-Afrika het dit goed gedink om hierdie buitelanders werkspermitte te gee sodat hulle in Suid-Afrika kan werk. Niemand het ʼn monopolie op geweld nie. Indien buitelanders die slagoffers van geweld word, sal ons organisasie daarop reageer.”

Juru het bygevoeg die Suid-Afrikaanse regering het ʼn verantwoordelikheid om buitelanders in die land te beskerm. “Ons het al voorheen gesien hoe word buitelanders vermoor, aangerand en gedreig sonder dat ʼn enkele persoon in hegtenis geneem of aangekla word,” sê hy. “Die regte van buitelanders moet gerespekteer word.”

‘n Vragmotor wat in Maart vanjaar tussen Villiersdorp en Botrivier in die Overberg met ‘n petrolbom bestook is. (Foto: Verskaf)

Die Hoë Kommissie van Zambië in Suid-Afrika het ook sy kommer uitgespreek en ʼn reiskennisgewing uitgereik waarin hy Zambiese vragmotorbestuurders waarsku om nie na Suid-Afrika te reis totdat hul veiligheid gewaarborg kan word nie.

In die kennisgewing sê die kommissie hy is ook nie bewus van die oorsprong van die gerugte nie, maar dat Zambiese vragmotorbestuurders in die verlede al aangeval is deur hul Suid-Afrikaanse eweknieë in hul stryd om beter werksomstandighede van hul werkgewers. “Die kommissie raai Zambiese vragmotorbestuurders wat wel op 2 September Suid-Afrika gaan binnekom of in Suid-Afrika gaan wees, aan om hul vragmotors op ʼn veilige plek te stoor om enige lewensverlies of eiendomskade te verhoed.”

Die Namibiese Uitsaaikommissie berig Namibië se hoë kommissaris in Suid-Afrika het gesê hy kon geen bevestiging van enige onafhanklike organisasies kry rakende die geloofwaardigheid van die gerugte oor beplande aanvalle op buitelandse vragmotorbestuurders nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Skoolgeld

Dankie MM! Sou graag al vroër die inligting wou bevestig en dankbaar julle hou ons op hoogte!

jaco

Waarom word Suid-Afrikaners dan nie as drywers in diens geneem nie? Waarom amper net buitelanders? SA het dan 30% of meer werkloosheidsyfer. Iets maak nie sin nie. L

Ander Koos

Polisie gereed … regtig?

Stretch

Juru nou Juju?

leser

@jaco
die sa werkloosheids elemente is te lui om die werk wat die buitelanders doen, te doen, hulle wil op hul agterente sit, klomp geld he, maar so min moontlik doen, dis mos nou te lekker in sa, alles is verniet
steek iets vandag aan die brand, maar wil dit more terug he